Haradinaj: Vota e fshehtë s’e zgjidh bllokadën, presidentja të nisë konsultime me partitë

Kreu i Aleancës për Ardhmërinë e Kosovës (AAK), Ramush Haradinaj, ka theksuar se një nga opsionet për të zhbllokuar situatën politike është ndërhyrja e presidentes.

“Një opsion tjetër është kyçja e institucionit të presidentes, në këtë rast presidentja. Unë besoj se Presidentja ne mandatin e saj ose mundet vetë të marrë iniciativë të konsultës me partitë politike, duke qenë në dijeni që ka ngec ecja përpara e konstituimit të institucioneve. Ose mund t’i drejtohet Gjykatës, por i duhet një vendim paraprak”, ka deklaruar ai në Debat Plus.

Sa i përket idesë për votim të fshehtë në Kuvend, ai ka theksuar se kjo nuk do të zgjidhte krizën aktuale.

“Unë nuk jam kundër votës së fshehtë, sepse nuk ndryshon për opozitën asgjë. Për çka se e drejta në votë është po, jo, abstenim ajo nuk ndryshon. Ekziston edhe mosmarrja pjesë në votim. Mirëpo edhe nëse do të kalonte procedura e votimit të fshehtë nuk do ta zgjidhte çështjen e bllokadës në Kuvend. Jemi blloku, është bllokadë nuk duhet ta fshehim. Pra edhe nëse do ta arrinte VV-ja krijimin e komisionit dakordimin për votim të fshehtë prapë nuk do të ndryshonte epilogu”, ka deklaruar ai.

Ai ka shtuar se edhe në rast se Lëvizja Vetëvendosje arrin dakordimin për votim të fshehtë, nuk pret që deputetët e opozitës të ndryshojnë qëndrimin.

“Ka deputetë të opozitës që nuk janë të kënaqur me situatën, por asnjëri prej tyre nuk do të veprojë kundër partisë së vet”, ka shtuar kreu i AAK-së.

Haradinaj e ka cilësuar votimin e fshehtë vetëm si një pengesë shtesë që nuk do të ndihmojë procesin e konstituimit të institucioneve