Hamasi e konfirmon vdekjen e udhëheqësit Yahya Sinwar

Udhëheqësi i Hamasit, Yahya Sinwar, arkitekt i sulmeve të tetorit, që u bënë dita më vdekjeprurëse në historinë e Izraelit, u vra gjatë luftimeve, tha të premten nënkryetari dhe shefi për bisedime i këtij grupi.

Vdekja e tij, që vjen pas vrasjes së udhëheqësve e komandantëve të tjerë të grupit nga forcat izraelite, do t’i japë një goditje të fortë Hamasit, që është ballafaquar me sulme të pamëshirshme ajrore që nga sulmi i 7 tetorit të vitit 2023 në Izraeli, kur u vranë 1.200 njerëz, sipas shifrave të autoriteteve izraelite, raporton agjencia “Reuters”.

Sinwari ishte emëruar udhëheqës i përgjithshëm i grupit më 6 gusht, pasi ish-shefi politik i Hamasit, Ismail Haniyeh, ishte vrarë në Teheran më 31 korrik.

I njohur gjerësisht si arkitekt i sulmit të 7 tetorit të vitit të kaluar, ngjarja më shkatërruese për Izraelin në disa dekada, ai qëndronte në Gaza, duke i sfiduar përpjekjet e Izraelit për ta vrarë që nga fillimi i luftës.

Ai u lind në një kamp refugjatësh në qytetin jugor të Gazës, Khan Younis, ndërsa udhëheqës i Hamasit në Gaza u zgjodh në vitin 2017.