Halit Barani e bën të ditur ditën kur do ta heqë mjekrën

Veprimtari për Mbrojtjen e të Drejtave dhe Lirive të Njeriut, Halit Barani, ka vendosur që ta heqë mjekrën karakteristike.

Por, 67-vjeçari që kishte dëshmuar edhe në procesin kundër Sllobodan Millosheviqit, meqenëse ishte marrë me evidentimin e rasteve të dhunës që nga fundi i viteve të 80-ta, edhe këtë vendim personal e lidh me çështjen kombëtare.

Kështu të paktën tha si mysafir i Arbresha Kelmendit, në Klan Kosova.

“Mundeni me më pa pa mjekër kur nuk ka më kufi shqiptaro-shqiptar. Kur nuk ka më aty absolut kurrfarë objekti, por është fushë kah të duash me lëviz, sikur kur lëviz nëpër Gërmi”, tha ai, i bindur se kjo ditë është e afërt.

Ditë më parë në Mitrovicë, u promovua libri për jetën dhe veprën e Baranit, veçse kjo ndodhi, pikërisht në 6 mujorin e vdekjes së autorit, Hysni Syla i cili humbi jetën tragjikisht në një aksident trafiku. Mikun e ndjerë, Barani e kujtoi edhe gjatë intervistës në radio, por pa mundur t’i ndalë lotët.

“Hysni Sylën e kam pas shok për 23 vjet. Shok të pandashëm e jo shok me dallavere, me interesa. Ka qenë i qetë, dhe nuk ka njeri që ka pas kontakte me të, që mund të thotë se ia ka fol ndonjë fjalë të rënd”, e kujtoi ai gazetarin, që në një periudhë kishte punuar edhe si drejtor i Qendrës së Kulturës, aty ku Barani e kishte ushtruar edhe punën artistike me teatrin e qytetit.