Hakohen disa media ruse, publikohen mesazhe kundër Putinit

Disa uebfaqe të mediave ruse janë hakuar gjatë së hënës, dhe po shfaqin mesazhe kundër luftës dhe Putinit.

“Të dashur qytetarë. Ju bëjmë thirrje ta ndaloni këtë çmenduri, mos i dërgoni në vdekje të sigurt djemtë dhe burrat tuaj. Putini na bën të gënjejmë dhe po na vë në rrezik”, thuhet ndër mesazhet e përçuara në rusisht në Forbes Russia, Fontanka, Takie Dela, që ka parë CNN.

“Ne jemi izoluar nga gjithë bota, nafta dhe gazi nuk tregtohen më. Pas disa vitesh, do të jetojmë si në Korenë e Veriut”, thuhet ndër tjera.

Mesazhi është nënshkruar nga Anonymous, kolektivi i hakerëve dhe nga një grup që thonë se janë “gazetarë që kujdesen”.

“Ky mesazh do të fshihet dhe disa prej nesh do të shkarkohen apo edhe burgosen. Por ne nuk mund ta durojmë më këtë”, thanë ata.