Guerot për ngërçin politik: Bllokimi aktual po dëmton Kosovën

Ambasadorët e shteteve perëndimore të akredituar në Kosovë, morën pjesë sot në seancën konstituive të Kuvendit – që sërish nuk prodhoi rezultat.

Në mesin e tyre ishte edhe ambasadori i Francës, Olivier Guerot, i cili përmes një postimi në platformën “X” ka shprehur shqetësimin për ngërçin politik në vend.

“Së bashku me ambasadorë të tjerë, mora pjesë në seancën e sotme të Kuvendit. Bllokimi aktual po dëmton Kosovën”, shkroi ai.

Ai u bëri thirrje të gjitha palëve politike që të veprojnë sa më parë, për shkak se afati i vendosur nga Gjykata Kushtetuese për konstituimin e Kuvendit skadon të shtunën.

Reagime të ngjashme kanë ardhur edhe nga ambasadori i Gjermanisë, Jorn Rohde, ai i Mbretërisë së Bashkuar, Jonathan Hargreaves, si dhe shefi i Zyrës së Bashkimit Evropian në Kosovë, Aivo Orav.

Të gjithë kërkuan zgjidhje urgjente dhe reflektim institucional para se situata të hyjë në një fazë të paparashikueshme.