Gruaja e Liburn Aliut rehatohet në punë të shtetit

Bashkëshortja e Ministrit të Mjedisit, Planifikimit Hapësinor dhe Infrastrukturës, Liburn Aliu, Lumnije Aliu është punësuar në punë të shtetit

Aliu, gjoja ka dalë kandidatja më e suksesshme, në konkursin për pozitën e Ekspertit për Transparencë dhe Qasje në Dokumente Publike në Agjencinë për Informim dhe Privatësi (AIP).

Njoftimi se gruaja e Ministrit Aliu është përzgjedhur për këtë pozitë është bërë me 8 korrik 2024 nga Njësia e Menaxhimit të Burimeve Njerëzore e AIP-it.

“Kandidati fitues në bazë të vlerësimit profesional nga Komisioni i Përzgjedhjes në konkursin me numër RN00014237 për pozitën Ekspert për Transparencë dhe Qasje në Dokumente Publike në kuadër të Agjencisë për Informim dhe Privatësi, është: Kandidati Lumnije Aliu. Pikët totale: 82.00 pikë“, thuhet në dokument.

Bazuar në disa deklarime të më hershme të pasurisë së Liburn Aliut, para se ai të kishte postin ministror, gruaja e tij deklaronte se ishte e punësuar në kompani private që lidheshin me lëminë e inxhinierisë dhe projektimeve. Për këtë, Gazeta Online Reporteri.net është interesuar të enjten në AIP rreth përgatitjes profesionale të Lumnije Aliut, sikurse edhe nëse ka pasur ndikime politike rreth përzgjedhjes së saj në këtë pozitë, por deri në momentin e publikimit të artikullit nuk kemi pranuar përgjigje.