Gratë e dhunuara gjatë luftës në Kosovë ende të stigmatizuara nga shoqëria e familja

Gratë e dhunuara gjatë luftës së fundit në Kosovë po vazhdojnë të stigmatizohen nga shoqëria kosovare. Kështu thotë Sebahate Pacolli-Krasniqi nga Qendra Kosovare për Rehabilitimin e të Mbijetuarave të Torturës. Ajo shprehet se këto gra ende nuk marrin mbështetjen e nevojshme nga shoqëria e familja.

Gjykata Themelore në Prishtinë ka dënuar me dhjetë vjet burgim, Zoran Vukotiqin, për krime lufte kundër popullatës civile, përkatësisht për dhunim seksual ndaj gruaje shqiptare në komunën e Vushtrrisë.

Këtë vendim e kanë pritur mirë të gjitha viktimat e dhunës seksuale gjatë luftës.

Sebahate Pacolli-Krasniqi nga Qendra Kosovare për Rehabilitimin e të Mbijetuarave të Torturës, e ftuar në emisionin Frontal në T7, është shprehur e lumtur për dënimin me 10 vite burgim të Vukotiqit.

Ajo është shprehur se ky vendim është shpresë se do të ketë drejtësi për viktimat.

Ndërsa, Pacolli-Krasniqi ka folur edhe për pasojat që ka pasur dhuna seksuale të viktimat.

Ajo ka thënë se ato vazhdojnë të stigmatizohen nga shoqëria kosovare, për këtë disa prej tyre edhe malltretohen nga burrat e tyre, si shohin fëmijët e tyre e martohen edhe me persona më të vjetër në moshë se ato.

“Ka gra që malltretohen nga burrat, që si shohin fëmijët, e që janë martuar me persona më të vjetër në moshë se to. Këto janë pasojat. Gjëra të mira po ndodhin, por shoqëria jonë ende e ka të vështirë ti pranojë të gjitha gjëra. Ende ka stigmë”, ka theksuar ajo.

Megjithatë, Pacolli-Krasniqi ka kërkuar nga viktimat e dhunës seksuale që të kërkojnë drejtësi.

Ajo është shprehur se edhe për rastin e dënimit të Vukotiqit do t’i përdorin të gjitha rrugët ligjore që dënimi ndaj tij të rritet.

Ndërsa, edhe Shyhrete Tahiri-Sylejmani, viktimë e dhunës seksuale në Kosovë, ka kërkuar nga viktimat e dhunës seksuale gjatë luftës që të mos heqin dorë së kërkuari drejtësi.