Gjykimi ndaj Thaçit dhe të tjerëve – pranohen edhe dy viktima

Gjykata Speciale ka marrë vendim që në rastin e Thaçit, Veselit, Selimit e Krasniqit të pranohen edhe dy viktima pjesëmarrëse në këtë proces.

Ky vendim është marrë më 10 korrik dhe se ato do t’i shtohen grupit 1 të viktimave pjesëmarrëse, numri i të cilave ishte 152.

“Më 10 korrik 2024, trupi gjykues II nxori vendimin më të fundit mbi pjesëmarrjen e viktimave në çështjen Thaçi dhe të tjerët. Dy parashtrues të tjerë kërkesash u pranuan si viktima pjesëmarrëse në proces gjyqësor, të cilët do t’i shtohen grupit ekzistues të viktimave në këtë çështje (grupi 1 i cili numëronte 152 viktima pjesëmarrëse) dhe do të përfaqësohen nga i njëjti mbrojtës viktimash”, thuhet në njoftim.

DhSK njofton se afati për dorëzimin e kërkesave për pjesëmarrje si viktima në proces ka skaduar, mirëpo është vendosur kësisoj për shkak se ekzistojnë arsye të vlefshme.

“Në vendimin e tij, trupi gjykues theksoi se afati për paraqitjen e kërkesave për pranimin e viktimave pjesëmarrëse në këtë çështje ka skaduar më 15 shkurt 2023, por meqenëse ekziston një arsye e vlefshme, ka vendosur t’i pranojë këto kërkesa edhe pse ato ishin dorëzuar pas afatit të paraparë”, thuhet tutje.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.