Gjykata e Lartë i jep fuqi të jashtëzakonshme Trumpit

Gjykata e Lartë e Shteteve të Bashkuara ka dhënë një vendim të rëndësishëm që favorizon administratën e presidentit Donald Trump, duke nënvizuar se gjykatat më të ulëta ndoshta kanë tejkaluar autoritetin e tyre kur kanë lëshuar vendime ndalimi në mbarë vendin.

Kjo ka kufizuar mundësinë e sistemit gjyqësor për të kontrolluar veprimet e pushtetit ekzekutiv.

Vendimi i Gjykatës së Lartë, i shpallur të premten, ka ardhur si përgjigje ndaj urdhrave të pezullimit të lëshuara nga gjykatat federale në Washington, Maryland dhe Massachusetts. Këto gjykata kishin bllokuar përpjekjet e administratës Trump për të kufizuar të drejtën e shtetësisë për fëmijët e emigrantëve të paligjshëm.

“Vendimet ndaluese me efekt të përgjithshëm ndoshta e tejkalojnë autoritetin e dhënë nga Kongresi për gjykatat federale. Gjykata pranon kërkesën e Qeverisë për pezullim të pjesshëm të këtyre vendimeve,” tha shumica e Gjykatës së Lartë.

Sipas Kushtetutës së SHBA-së, çdo fëmijë që lind në territorin e Shteteve të Bashkuara ka të drejtën e shtetësisë, pavarësisht nga statusi ligjor i prindërve të tij. Megjithatë, administrata Trump ka pretenduar se shtetësinë amerikane mund ta marrin vetëm ata që janë legalisht në vend, duke përjashtuar emigrantët e paligjshëm dhe ata me qëndrim të përkohshëm.

“Ky vendim vlen vetëm në atë masë sa që ndalesat janë më të gjera sesa nevoja,” theksoi Gjykata, duke sugjeruar se ndalesat mund të vazhdojnë të zbatohen vetëm për paditësit konkretë të këtyre rasteve.

Vendimi ka ndarë edhe një herë Gjykatën e Lartë sipas vijave partiake. Gjyqtarët konservatorë kanë përbërë shumicën, me gjashtë vota pro, ndërsa tre gjyqtarët liberalë kanë dhënë mendim kundërshtues. Amy Coney Barrett, gjyqtarja më e re e emëruar nga Trump, ka hartuar vendimin e shumicës.