Gjuajti me armë në një aheng familjar, Policia e gjen 20-vjeçarin në Shtime dhe hap rast ndaj tij

Policia e Kosovës ka njoftuar se ka hapur rast ndaj një 20-vjeçari në Shtime për “Mbajtja në pronësi, kontroll ose posedim të paautorizuar të armëve” dhe “Përdorimi i armës”, meqë i njëjti kishte shtënë me armë zjarri në një aheng familjar më 10 gusht.

Pas intervistimit, i njëjti është liruar në procedurë të rregullt. Të njëjtit i është konfiskuar edhe arma.

Më datën 11.08.2025, rreth orës 15:45, stacioni policor në Shtime ka pranuar informatën për gjuajtje me armë zjarri në rrugën “Ymer Prizreni”, gjatë një ahengu familjar të mbajtur më 10.08.2025. Hetuesit policorë kanë identifikuar, lokalizuar dhe kontaktuar të dyshuarin E.M. (20 vjeç), i cili ka pranuar se kishte shtënë me armë zjarri. Arma e përdorur, një pistoletë është konfiskuar nga policia. I dyshuari është shoqëruar në stacionin policor në Shtime, është intervistuar nga hetuesit dhe me vendim të prokurorit të shtetit, është liruar në procedurë të rregullt. Policia Rajonale e Ferizajt bën apel tek qytetarët që të shmangin përdorimin e armëve në festa, pasi ato rrezikojnë jetën dhe sigurinë e të gjithë pjesëmarrësve”, thuhet në njoftim