Gjenerali amerikan i shpreh ngushëllime Thaçit: Lutemi për lirimin tuaj, shpresojmë që ky makth të marrë fund

Gjenerallejtënanti nga Ushtria Amerikane, Claude M. Kicklighter, ne një letër ngushëllimi drejtuar ish-presidentit të Kosovës, Hashim Thaçi, i ka shprehur ngushëllimet më të sinqerta për humbjen e babait të tij. 

Kicklighter ka shprehur se e kupton dhimbjen e thellë që vjen nga një humbje e tillë. 

Ai gjithashtu ka deklaruar se luten për lirimin e Thaçit, dhe bashkimin me familjen e tij.

“Me pikëllim të madh morëm vesh për ndarjen nga jeta të babait tuaj. Ju shprehim ngushëllimet tona më të sinqerta, juve dhe familjes suaj. E dimë nga përvoja se sa e dhimbshme është humbja e një prindi, sepse nuk ka asgjë që mund ta krahasojë këtë humbje të madhe. Lutemi që Zoti t’ju japë forcë juve dhe familjes suaj për të përballuar këto momente të vështira.

Vazhdojmë të lutemi për lirimin tuaj, në mënyrë që të bashkoheni me familjen tuaj, sidomos tani. Në vendin tim thuhet se drejtësia e vonuar është padrejtësi, dhe rasti juaj ka qenë padrejtësi që nga fillimi. Është shumë e dhimbshme që gjatë viteve të fundit të jetës së babait tuaj, ju nuk ishit pranë tij. Sa kam kuptuar, gjykata ju dha vetëm rreth tri orë për të qenë me të në momentet e fundit.” – ka shkruar gjenerallejtënanti amerikan.

Gjenerallejtënanti gjithashtu ka kujtuar se kishte planifikuar të vizitonte Thaçin në burg, por për shkak të një sëmundjeje e anuloi udhëtimin.

“Siç mund ta kujtoni, kisha planifikuar të ju vizitoja në burg, bashkë me Ambasadorin dhe Kongresmenin, Tony Hall, dhe Ambasadorin Ahmet Shala. Për shkak të një sëmundjeje, m’u desh ta anuloj udhëtimin tim, por kam vazhduar të lutem për ju dhe familjen tuaj, dhe do të vazhdoj ta bëj këtë deri në ditën kur do të liroheni e do të jeni sërish pranë familjes suaj, miqve dhe popullit të mrekullueshëm të Kosovës. 

Shpresoj që të mund t’ju vizitojmë së shpejti, dhe lutja ime është që deri atëherë ky makth të ketë marrë fund.

Amerika është me të vërtetë e bekuar që ka një lidhje kaq të fortë miqësie mes dy kombeve dhe popujve tanë. Jam thellësisht mirënjohës për këtë miqësi.” – ka përfunduar ai.