Gjatë 24 orëve të fundit në Kosovë janë raportuar gjashtë raste të dhunës në familje, shkruan GazetaDemos. Dy prej tyre kanë ndodhur në Fushë-Kosovë, me ç’rast nga rasti i parë janë arrestuar dy persona, ndërsa nga rasti i dyte është arrestuar një person.
“Fushë Kosovë / 22.10.2023 – 16:00. Janë arrestuar dy të dyshuar, një mashkull dhe një femër kosovare pasi kanë sulmuar fizikisht viktimën femër kosovare, e cila si pasojë ka pësuar lëndime dhe ka pranuar tretman mjekësor.
Pas procedurave policore viktima është dërguar në strehimore, kurse të dyshuarit me vendim të prokurorit janë dërguar në mbajtje”, thuhet në raportin e Policisë për rastin e parë.
Ndërkaq, në rastin e dytë në Fushë-Kosovë, i dyshuari ka sulmuar dy gra. “Fushë Kosovë / 23.10.2023 – 10:00. Është arrestuar i dyshuari kosovar për shkak se kishte sulmuar fizikisht dy viktimat femra kosovare.
Viktimat kanë pranuar trajtim mjekësor, ndërsa i dyshuari me vendim të prokurorit pas intervistimit është dërguar në mbajtje”, shkruhet në raport.
Rasti tjetër i dhunës në familje ka ndodhur në Obiliq, ku një grua është arrestuar përmes telefonit nga një burrë. “Obiliq / 23.10.2023 – 19:05.
Ankuesja kosovare ka njoftuar se ka pranuar përmes telefonit mesazhe me përmbajtje kërcënuese nga i dyshuari kosovar. Lidhur me rastin palët e përfshira në rast janë sjellur në stacion për intervistim, dhe me vendim të prokurorit janë liruar në procedurë të rregullt”, ka bërë të ditur Policia.
Një tjetër rast i dhunës në familjë ka ndodhur në Pejë, ku një person ka ushtruar dhunë dhe ka kërcënuar disa persona në familje. “Pejë / 23.10.2023 – 10:30.
Viktima mashkull kosovar ka raportuar se i dyshuari mashkull kosovar ndaj tij dhe personave tjerë është duke ushtruar dhunë psiqike dhe kanosje.
Lidhur me rastin i dyshuari është arrestuar dhe me vendim të prokurorit është dërguar në mbajtje”, thuhet në raportin e Policisë.
Rasti tjetër ka ndodhur në Gjakovë, me ç’rast janë arrestuar dy gra.
“Gjakovë / 23.10.2023 – 20:00. Janë arrestuar dy femra kosovare për shkak se ishin fjalosur e fyer mes vete. Pas inicimit të rastit të dyshuarat me vendim të prokurorit janë liruar në procedurë të rregullt”, ka njoftuar Policia përmes raportit 24-orësh.
Ndërkaq, një rast tjetër i dhunës në familje ka ndodhur edhe në pjesën veriore të Kosovës, ku një person është dërguar në mbajtje. “Mitrovicë Veri / 23.10.2023 – 22:00.
Është arrestuar i dyshuari kosovar për shkak se kishte sulmuar fizikisht viktimën femër. I dyshuari me vendim të prokurorit pas intervistimit është dërguar në mbajtje”, shkruhet në raportin e Policisë.