Gërvalla në KS: Serbia duhet të zgjedhë, t’i bashkohet Perëndimit apo të mbetet dorë e zgjatur e Rusisë

Ministrja e Punëve të Jashtme të Kosovës, Donika Gërvalla-Schwarz, ka folur në mbledhjen e radhës së Këshillit të Sigurimit të OKB-së për Kosovën.

Në fjalën e saj, Gërvalla ka thënë se UNMIK-u tashmë nuk ka rol administrativ në Kosovë, ndërsa puna e organizatave ndërkombëtare vazhdon normalisht në vendin tonë.

Ajo ka thënë se “deri sa Kosova është gjithmonë në krahun Perëndimor dhe në mbështetje të botës demokratike, Serbia vazhdon të jetë satelit i Rusisë”.

Gërvalla ka thënë se aleanca e Serbisë me Rusinë, po bën që rajoni të mos jetë stabil.

Ministrja Gërvalla ka përmendur edhe gjenocidin e Serbisë në Kosovë dhe në Bosnje e Hercegovinë.

“Serbia ka kryer krime e gjenocid në vendin tonë deri kur ne jemi mbrojtur me një luftë të tmerrshme, e pastaj erdhi edhe ndërhyrja e NATO-s. Presidenti serb, Aleksandër Vuçiq, ka qenë ministër i Sllobodan Millosheviq, kasapit të Ballkanit i cili njihet për gjenocidet që ka kryer, duke përfshirë këtu edhe krimet në Bosnje e Hercegovinë”, ka thënë Gërvalla.

Ajo ka thënë se Ballkani Perëndimor do të stabilizohet atëherë kur Serbia të pranojë realitetin dhe të njohë Pavarësinë e Kosovës.

“Serbia ka një zgjidhje përpara, t’i bashkohet Perëndimit apo të mbetet dorë e zgjatur e Rusisë. Republika e Kosovës është shtet sovran dhe do të qëndrojë këtu për një kohë të gjatë”, ka thënë ndër të tjerash Gërvalla.