Gati dy muaj nga arrestimi i dy kosovarëve nga Serbia, familja e shqetësuar për gjendjen dhe pasigurinë e tyre

Brenda pak ditësh bëhen dy muaj që nga arrestimi i Rexhep Hotit dhe Gyven Azemit nga autoritetet serbe, teksa po siguronin dru në një pyll pranë pikës kufitare në Merdarë.

Ndërkohë, familjet e tyre vazhdojnë të jenë të shqetësuara për gjendjen e tyre dhe mungesën e informacionit lidhur me procesin gjyqësor dhe lirimin e mundshëm.

Nëna e Rexhep Hotit, Razia, ka folur për gjendjen e djalit të saj pas një vizite në burgun e Prokupljes, ku ai mbahet në paraburgim bashkë me të arrestuarin tjetër- tezakun e tij.

“Sot kam qenë në vizitë te djali në Prokuplje, në burgun ku po mbahet në paraburgim. Gjendja e tij shëndetësore nuk ishte edhe aq e mirë. Megjithatë thanë që janë mirë e nuk kanë probleme” deklaroi ajo për Indeksonline.

Ajo shprehu shqetësimin për mungesën e komunikimit dhe transparencës sa i përket procesit gjyqësor.

“Janë bërë gati dy muaj që kur janë në burg. Janë mërzitur shumë, askush nuk u ka thënë asnjë fjalë, dhe as ne si familje nuk kemi pasur kontakte zyrtare. Nuk kemi asnjë informacion për datën kur do të dalin para gjykatës. Ne vazhdojmë të jemi shumë të shqetësuar për situatën e tyre.”, vleresoi ajo.

Në lidhje me këtë rast, Ministria e Punëve të Jashtme dhe Diasporës pati bërë kërkesa zyrtare për sqarime nga autoritetet serbe.

“Zyra Ndërlidhëse e Republikës së Kosovës në Serbi ka dërguar kërkesë formale Qeverisë së Serbisë për konfirmimin e rastit dhe ofrimin e detajeve relevante, përfshirë identitetin dhe vendndodhjen e personave të arrestuar. Është njoftuar edhe Delegacioni i BE-së në Serbi dhe misionet diplomatike të vendeve të QUINT-it në Beograd.Pasi të konfirmohet situata, diplomatët tanë do të bëjnë kërkesë zyrtare për vizitë në qendrën e paraburgimit.”, thuhej mes tjerash në këtë njoftim.

Megjithatë, dy të rinjët kosovarë vazhdojnë paraburgimin në burgun e Prokupljes.