Gashi për sulmin terrorist në Banjskë: Kurti nuk po e falë Vuçiqin por, po e lidh me të

Analisti Astrit Gashi në RTV Dukagjini lidhur me deklarimin e kryeministrit Albin Kurti se sulmin terrorist në Banjskë të Zveçanit e ka kryer klani i Novi Sadit, ka thënë se i beson kryeministrit meqë ai mund të ketë informata më të sakta lidhur me këtë.

A.Gashi ka thënë se kryeministri Kurti po e lidh me përgjegjësi presidentin e Serbisë, Aleksandar Vuçiq “duke e ndërlidhur vëllaun e tij në krejt këtë matematikë”.

“Ne mundemi me bë konspiracione çfarë të dojmë, por nuk ka Albin Kurti asnjë synim që mundena me thënë unë, që me falë Vuçiqin. Përkundrazi, edhe si kryeministër I Kosovës, ai ka me të drejtë me lidh këtë sulm me Vuçiqin. Kjo është ndërlidhje për mendimin tim”, ka thënë tutje Gashi.

Ai më tej ka shtuar duke thënë se përtej kësaj çfarë po e pret Kosovën, e “tejkalon këtë ndërlidhje”.

“Çfarë po ndodh sot, ne nuk kemi as ndëshkim, as tërheqje të vërejtjes publike ndaj Vuçiqit, ndaj Serbisë për ngjarjet e 24 shtatorit. Nuk ka pasur as në vizitën e Lajçak-ut, nuk ka pasur as në Tiranë në Samitin e Berlinit, madje nuk ka pas as sot nga mbledhja që u mbajt në Bashkimin Evropian, në Komisionin Evropian nuk përmendet me asnjë fjali Kosova në konkluzionet e ministrave të Jashtëm të BE-së”, ka thënë Gashi.

Gashi ka thënë se Kosova s’mund të bëjë përtej kësaj, përveçse të grumbulloj fakte me i “detyrua njerëzit e BE-së për me diskutua për këtë çështje”, duke shtuar se përgjigja e shteteve të mëdha nuk do të varet nga dokumentet tona.