Gashi (BSPK): Ka munguar transparenca në Ligjin për Paga

Kryetari i Këshillit Drejtues të Bashkimit të Sindikatave të Pavarura të Kosovës, Ali Gashi, ka thënë se në Ligjin për Paga ka munguar transparenca.

Në emisionin Info Magazine në Klan Kosova, ai ka shtuar se është shqetësuese që tani ky ligj do t’u nënshtrohet sërish procedurave te Ministria e Financave.

“Pothuajse janë gjetjet e njëjta për arsye se këto edhe i kemi ngritur në të gjitha takimet. Të them të drejtën problemi është që ka munguar transparenca”.

“Ne kur e kemi theksuar gjithmonë se mungesa e grupeve të interesit – në këtë rast sindikata dhe grupet e shoqërisë civile, të cilat preken nga ky ligj, në njëfarë forme edhe në kuptimin material edhe profesional – qeveria dhe ministria ka hezituar”.

“Gjithmonë e kam deklaruar se është dashur kujdes i madh dhe tash del që ligji thjesht ka defekte substanciale, por ajo që është më shqetësuese është fakti se kjo tani do t’i nënshtrohet sërish dërgimit tek ministria për Financa, Punë dhe Transfere”.