Garda Revolucionare merr përgjegjësinë e sulmit dhe lajmëron një goditje edhe më të ashpër

Garda Revolucionare Islamike e Iranit ka marrë zyrtarisht përgjegjësinë për lëshimin e raketave balistike në bazën ajrore amerikane Al Udeid në Katar, duke thënë se kjo ishte një përgjigje ndaj sulmit amerikan drejt objekteve bërthamore iraniane.

Sipas njoftimit nga vetë IRGC-ja, nuk do të ketë më një epokë të “goditjes dhe ikjes” dhe çdo sulm i përsëritur amerikan do të pasohet nga përgjigja iraniane.

Një paralajmërim ndërkaq ka qenë edhe ai ndaj Izraelit, ku është thënë se përshkallëzimi i sulmeve amerikane mund të sjellë “fundin e regjimit sionist”.

Njoftimi i plotë
Në përgjigje të sulmit të SHBA-ve ndaj objekteve bërthamore paqësore të Iranit, Korpusi i Gardës Revolucionare Islamike (IRGC) njoftoi se ka nisur një sulm të fuqishëm me raketa në Bazën Ajrore Al-Udeid në Katar – baza më e madhe ushtarake e Amerikës në Azinë Perëndimore.

Ky sulm hakmarrës, i kryer në kuadër të Operacionit Basharat al-Fath, u miratua nga Këshilli Suprem i Sigurisë Kombëtare të Iranit dhe u drejtua nga Komanda Qendrore Khatam al-Anbiya.

Epoka e “goditjes dhe ikjes” ka mbaruar – çdo sulm i përsëritur do të përshpejtojë rënien e pranisë amerikane në Azinë Perëndimore.

Deklarata përfundon me një paralajmërim: Sulmet e ardhshme mund të çojnë në rënien si të infrastrukturës ushtarake amerikane në rajon, ashtu edhe të regjimit sionist.