Filmi kosovar, ambasadori i nënçmuar nga shteti

“Ndonëse filmi në Kosovë ka pasur suksese të jashtëzakonshme nëpër festivale botërore, ai është suksesi më i madh i fshehur dhe i nënçmuar nga shteti i Kosovës”, thonë kineastët e Kosovës për Gazetën Demos.

Kinematografia është ambasadori më i mirë i shtetit të Kosovës. Përmes filmave të realizuar dhjetë viteve të fundit, Kosova ka arritur të depërtojë te shikuesi nëpër botë, përmes temave të ndryshme.

Bota di sot më shumë për Kosovën , të tashmen dhe të kaluarën e saj, falë filmave që kanë udhëtuar nëpër festivale nëpër botë, thonë profesionistët e fushës së kinematografisë.

Gjithashtu, kineastët kanë sjellë në Kosovë, çmime prestigjioze, të cilat çmohen shumë në botë.

Njëri prej filmave të suksesshëm në arenën ndërkombëtare, që është realizuar brenda këtyre dhjetë viteve të fundit është edhe “Nëntor i ftohtë”, në regji të Ismet Sijarinës.

Ky film sjell një rrëfim nga vitet e ’90-ta, periudhës së represionit të Serbisë së Millosheviqit mbi shqiptarët e Kosovës.

“Nëntor i ftohtë”, ka arritur të dërgoj mesazhin nëpër botë, për mënyrën se si janë trajtuar shqiptarët e Kosovës nën pushtimin serb, gjatë viteve të ’90-ta.

Regjisori Sijarina është i mendimit se filmi kosovar për momentin është fusha më e suksesshme në Kosovë.

“Kineastët kanë arritur që realitetin kosovar ta trajtojnë në kinematografi, një realitet që është shumë i ngjashëm me neo-realizimin italian dhe atë t’ia shfaqin botës”, ka deklaruar për gazetën “Demos”, regjisori Sijarina.

Se filmi është ambasadori më i fuqishëm i Kosovës sot, kjo nuk diskutohet, por, fatkeqësisht, siç thotë aktori dhe producenti Fatmir Spahiu, filmi është suksesi më i madh i fshehur dhe i nënçmuar nga shteti.

“Është i nënçmuar sepse ndahet pak buxhet. Shteti më shumë është fokusuar në sport, ndërsa e ka lënë nën hije filmin. Për mendimin tim, fuqia e filmit është më i madh në botë sepse është tjetër nivel i prezantimit, është nivel intelektual”, shprehet producenti Spahiu.

“Mos harroni, të gjithë duhet ta dinë, edhe shteti, se  jemi një hap larg golit të madh, çmimit Oscar”, thotë ai.

Mendime të njejta ndanë edhe regjisori i filmit “Cirku fluturues”, Fatos Berisha, i cili këto ditë u shpërblye me çmimin e gjashtë me radhë,  “Silver Award”, në Festivalin Ndërkombëtar të Filmit Oriental në Gjenevë të Zvicrës.

Regjisori Berisha është i mendimit se filmi ka ndikuar për të mirë në imazhin e Kosovës edhe për shkak  të mundësive të reja teknologjike sepse mundësia e depërtimit ndërkombëtar është më i mirë për filmin.

“Duke marrë parasysh se Kosova është vend i vogël dhe rrjedhimisht janë prodhuar pak filma, numri i sukseseve është tejet i madh. Kjo tregon se sa i fuqishëm është filmi dhe çfarë ambasadori kemi në dorë që duhet ta mbështesim më shumë financiarisht” , thotë Berisha.

Dhjetë vitet e fundit, filmat e shkurtër dhe të merazhit të gjatë, janë prezantuar nëpër festivlet më prestigjioze botërore, duke sjellë edhe çmime në Kosovë.

Një prej sukseseve të mëdha të kësaj fushe është edhe shpërblimi me tre çmime kryesore i filmit “Zgjoi”, në regji të Blerta Bashollit, në Sundance Film Festival në Shtetet e Bashkruara të Amerikës. /GazetaDemos/