Feraj në rolin e “kryeredaktorit mbarëshqiptar”, Maliqi e quan “enverist që synon disciplinim të gazetarëve”

Dy ditë pasi kryeministri i Kosovës, Albin Kurti, shprehu preferencat e tij në një konferencë për media, se për çfarë duhet pyetur më pak në këmbim të daljes më të shpeshtë në konferenca, ka reaguar edhe përkrahësi i tij nga Shqipëria, Hysamedin Feraj.

Ky i fundit, s’ka nguruar të shfaqë pretendimet e tij, se si disa gazetarë, sipas tij, pranojnë mësime vetëm nga presidenti i Serbisë.

“Disa gazetarë, emrat e të cilëve i njohim, nuk pranojnë t’i mësojë askush tjetër, veç Aleksandër Vuçiqit, se cilat pyetje duhet t’i bëjnë. Ky po, sepse i bën gazetarë të pavarur… nga shqiptaria!

Jeni në trendin modern: nxënësi e zgjedh mësuesin!”, ka shkruar Feraj, i frustruar për reagimet dhe kritikat ndaj një qasje të tillë të Kurtit në raport me mediat.

“Mos harroni pyetjen që bën Vuçiqi: çka do t’i japë Kosova Serbise? Bëjeni panda atë pyetje. Bëni presion: Çka? Çka?Mësimet e Vuçiqit ju bëjnë gazetarë të pavarur nga Albini. Por varësia nga Serbia ju është mësuar. Apo keni lindur të ditur? Instantë karetzianë?!”, ka shtuar tutje Feraj.

Ndaj një mendimi të tillë të Hysamedin Ferajt ka reaguar Agon Maliqi, i cili e ka quajtur përkrahësin e Kurtit si një ideolog enverist i cili i është rikthyer profesionit të disciplimit të gazetarëve, duke kujtuar të kaluarën e Ferajt gjatë regjimit të Enver Hoxhës.

“Ideologët enveristë i rikthehen zanatit të disciplinimit të gazetarëve. Ani thotë “gazetarë të pavarur… nga shqiptaria”. Ruaju fort prej atyre që e shohin veten si “më shqiptarë” se të tjerët”, ka shkruar Maliqi në twitter.

 

Reklama