FC Prishtina rikthehet në “Fadil Vokrri” kundër Vushtrrisë në ndeshjen gjysmëfinale të Kupës së Kosovës

FC Prishtina ka pasur fat në shortin që u hodh për ndeshjet gjysmëfinale të Kupës së Kosovës.

Ekipi që tanimë po drejtohet nga trajneri Debatik Curri do të ketë përballë Vushtrrinë, ekipin që bën gara në Ligën e Parë.

Lajmi i mirë për Prishtinën është se pas një kohe do të rikthehet në stadiumin “Fadil Vokrri”, pikërisht në ndeshjen e kthimit kundër Vushtrrisë më 19 prill.

Këtë e ka konfirmuar FC Prishtina në njoftimin në faqen zyrtare.

“Prishtina do të përballet me FC Vushtrrinë, ekip që garon në Ligën e Parë. Në këtë fazë të garës do të zhvillohen dy ndeshje (vajtje/ardhje). Ndeshja e parë do të zhvillohet në Vushtrri më 5 prill, kurse ajo e kthimit në Prishtinë më 19 prill” – thuhet në njoftimin e Prishtinës.

Skuadra më e trofeshme e futbollit në Kosovë tash e një kohë i ka zhvilluar ndeshjet si vendas në stadiumin “Sami Kelmendi” në Lipjan, për shkak të ruajtjes së fushës në stadiumin e kryeqytetit për ndeshjet e Kombëtares së Kosovës në muajin mars.