Albanian
Croatian
English
French
German
Serbian
Turkish
Byroja Federale e Hetimeve (FBI) në Shtetet e Bashkuara të Amerikës, po i ofron ndihmë Policisë së Kosovës në hetimet ndaj grupit famëkeq ‘AlbKings’.
Drejtori i Departamentit të Hetimeve në Policinë e Kosovës, Agron Nezaj tha sot në mbledhjen e Komisionit për Çështje të Sigurisë dhe Mbrojtjes se hetimet ndaj grupit që transmeton imazhe intime të vajzave dhe grave kanë nisur në vitin 2023.
“Sa i përket rastit AlbKings, drejtoria për Hetimin e Krimeve Kibernetike informacionet e para i ka pasur në vitin 2023 dhe menjëherë kemi njoftuar Prokurorin e Shtetit ku kemi filluar hetime në drejtim të tri veprave penale: Materiale me përmbajtje dhe shfrytëzim të keqpërdorimit seksual të fëmijëve, vjedhje e identitetit dhe kredencialeve e shantazh. E keni parë edhe në publik që ky grup poston përmbajtje pornografike të dëmshme”, tha Nezaj.
Ai tha se në hetime është e përfshirë edhe FBI-ja, ndërsa tregoi se faqet janë të hapura në Rusi dhe të regjistruara në Dubai të Emirateve të Bashkuara Arabe.
“Deri më tani kemi arritur të arrestojmë katër persona. Jemi në vazhdën e hetimeve për të gjtiha këto raste. Kemi bashkëpunim edhe ndërkombëtar, sidomos bashkëpunim kemi me FBI. Kemi sfida të ndryshme për shkak se faqet, kemi arritur t’i mbyllim, por janë hapur prapë. Kemi informacione që faqet janë të hapura në Rusi, me vendndodhje në Dubai, në Emiratet e Bashkuara Arabe”, tha Nezaj.
“Është mjaft sfiduese, por ne jemi duke e bërë të pamundshëm duke pasur parasysh trajnimet që kanë kryer kjo njësi por edhe për shkak të përkrahjes ndërkombëtare që kemi në këtë çështje”, u shpreh ai.
Njëri nga administratorët e grupit ‘AlbKings’ është arrestuar në prill të këtij viti dhe me vendim të Gjykatës po mbahet në paraburgim.
Në raportimin në Komisionin për Çështje të Sigurisë dhe të Mbrojtjes, drejtori i Policisë së Kosovës, Gazmend Hoxha, është pyetur edhe për rastin “AlbKings”.
Hoxha ka thënë se lidhur me këtë rast, Policia e Kosovës është duke i zhvilluar hetimet.
“Njësitet tona profesionale kanë bërë një hetim, disa arrestime”, ka thënë Hoxha.
Kujtojmë që më 18 prill, njëri nga adminët e “AlbKings”, grupit që ka publikuar fotografi eksplicite dhe të dhënat personale të grave e vajzave, është arrestuar nga Policia dhe ndaj tij Gjykata Themelore në Prishtinë, ka caktuar masën e paraburgimit prej një muaj.
“Gjykata vlerësoj se duhet të caktohet paraburgimi, duke marr parasysh faktin se i pandehuri E.N është shtetas i huaj, shtetas i Republikës së Serbisë dhe nuk ka vendbanim në Republikën e Kosovës dhe lehtësisht mund të largohet nga Kosova me qëllim që të shmanget procedurës që zhvillohet kundër tij, duke pat parasysh dëmin që është shkaktuar të dëmtuarve”, ka njoftuar Gjykata Themelore në Prishtinë.