Eurodeputeti austriak Lukas Mandl ka reaguar sot pas thirrjeve nacionaliste të tifozëve serbë të futbollit.
Tifo-grupi “Delije” kanë paraqitur një tank si koreografi, ndërsa e kanë shoqëruar me një shkrim ku thuhet: “Kur të kthehet ushtria në Kosovë”.
Mandl ka reaguar ashpër në një postim në Twitter, ku ka etiketuar edhe shefin e Politikës së Jashtme të BE-së, Josep Borrell, komisionerin për Zgjerim, Oliver Varhelyi dhe ndërmjetësin e BE-së për dialogun Miroslav Lajçak.
Ai i pyet ata nëse janë në dijeni se çfarë po ndodh.
“Ju ende dëshironi të sanksiononi? Kosovën? Josep Borrell, Oliver Varhelyi, Miroslav Lajçak a e shihni se çfarë po ndodh? Le të qetësohemi. Le të kontribuojmë në uljen e tensionit, pajtimin, paqen. Të gjithë. Të gjithë ne”, shkruan Mandl.
You still want to sanction which country? Kosovo? @JosepBorrellF @OliverVarhelyi @MiroslavLajcak Can you see what‘s going on? Let‘s calm down. Let‘s contribute to deescalation, reconciliation, peace. Everyone. All of us. #EU #Kosovo https://t.co/YZ2ocMUNHr
— Lukas Mandl (@lukasmandl) July 28, 2023
Gjatë ditës së djeshme reagoi edhe kryeministri i vendit, Albin Kurti.
Kurti, në reagimin e tij është kthyer në histori të viteve të 90’ta, ku tifozët e Crvena Zvezda ishin revoltuar kundër Kroacisë.
Kurti thotë se pas atij revoltimi kishin nisur luftërat ballkanike. Në atë kohë ajo tifozëri ka pasur lidhje me Arkanin famëkeq.
“Në vitin 1990, tifozët e klubit serb të futbollit Crvena Zvezda, të udhëhequr nga mafiozi serb i paditur nga ICTY, Arkan, u revoltuan kundër Kroacisë. Për disa, kjo ishte një shkëndijë e luftërave që pasuan. Dje Crvena Zvezda bëri thirrje që ushtria serbe të kthehet në Kosovë. Thirrjet për dhunë janë të pandërprera”, ka shkruar Kurti në Twitter