Emocionon Taulant Xhaka: Nuk desha të qaj para babait tim

Taulant Xhaka ka zhvilluar ndeshjen e tij të fundit si futbollist profesionist, duke i dhënë fund një karriere të jashtëzakonshme me FC Basel dhe Kombëtaren shqiptare.

Në një intervistë për gazetën zvicerane Blick, Xhaka rrëfeu emocionet e mëdha që përjetoi në ditën e lamtumirës.

“Më është dashur të përmbahem pasi nuk kam dashur të qaj para babait tim. Por tashmë kisha lotë në sytë e mi. Koreografia e tifozëve ishte e jashtëzakonshme.”

Ndeshja përmbyllëse u zhvillua më 24 maj 2025, ku FC Basel triumfoi me rezultat 4:0 ndaj Lucernit. Para fillimit të ndeshjes, klubi organizoi një ceremoni të veçantë për të nderuar kontributin e Xhakës, i cili për më shumë se një dekadë ishte një figurë kyçe në mesfushën e skuadrës.

Gjatë karrierës së tij me FC Basel, Taulant Xhaka zhvilloi 406 ndeshje zyrtare, duke fituar gjashtë herë titullin e kampionit të Zvicrës dhe tri herë Kupën e Zvicrës. Ai gjithashtu përfaqësoi Kombëtaren shqiptare në 31 ndeshje, duke shënuar një gol, dhe ishte pjesë e skuadrës që mori pjesë në Kampionatin Evropian 2016.

Në ceremoninë lamtumirëse ishte i pranishëm edhe vëllai i tij, Granit Xhaka, i cili përmes rrjeteve sociale shprehu krenarinë dhe dashurinë për Taulantin, duke e quajtur atë një emër që do të mbetet përgjithmonë në historinë e Baselit.