Ekstradohet në Serbi i dyshuari për rastin e Faton Hajrizit

Të premten, një person i dyshuar për organizimin e tranzitit nëpër Serbi të Faton Hajrizit, është ekstraduar në Serbi nga Bosnja dhe Hercegovina të premten, njoftoi Ministria e Punëve të Brendshme e Serbisë.

Ministri serb i Punëve të Brendshme, Ivica Daçiq tha se ekstradimi i të dyshuarit Z.R. është kryer në pikën kufitare Sremska Raça, transmeton Radio Evropa e Lirë.

Daçiq tha në një deklaratë se Hajrizi vrau inspektorin e policisë, Nikola Krsmanoviq, më 18 korrik 2024 në Loznicë.

Siç thuhet, Z.R. kërkohet në bazë të urdhrit të Gjykatës Themelore në Suboticë për përfundimin e procedurës penale për prodhim të paautorizuar dhe vendosje në treg të narkotikëve dhe urdhër të Gjykatës Themelore në Loznicë për përfundimin e procedurës penale për veprën penale “kalim i paligjshëm i kufirit shtetëror dhe kontrabandë me njerëz”.

Faton Hajrizi u vra më 19 korrik 2024, pasi qëlloi me armë një polic serb gjatë arrestimit në fshatin Trbushnicë të Loznicës.

Ministria e Punëve të Jashtme dhe Diaspora e Kosovës njoftoi më 22 korrik të vitit të kaluar se shtetasi Faton Hajrizi është vrarë në Serbi.