Ekipi serb i volejbollit diskualifikohet pasi refuzoi të luante ndaj Kosovës

Ekipi serb në volejbollin në rërë, që përbëhej nga Marko Makariq dhe Vukashin Rajkoviq, janë tërhequr nga gara sepse kanë refuzuar të dilnin në fushë e të luanin kundër ekipit që përfaqësohej nga Kosova, raporton “Republika”.

Makariq dhe Rajkoviq kanë vendosur që të mos luajnë dhe përfunduan në vendin e nëntë në renditje.

“Për fat të keq, ky është fundi i garës për ne sepse nesër ne nuk mund të dalim kundër të ashtuquajturës Përfaqësuese e Kosovës. Ne me krenari përfundojmë garimin në vendin e nëntë, sepse për ne Kosova është Serbi”, thuhet në njoftimin zyrtar të ekipit të tyre në Instagram.

Në Kampionatin Ballkanik të “Beach Volleyt”, Kosova u përfaqësua nga Dhurata Sylejmani, Valmira Ramadani, Fatlum Hajrizi dhe Erion Bajrami.

Si në konkurrencën e femrave, ashtu edhe në të meshkujve, Kosova u mposht nga Turqia.