Edona Llalloshi përkrahë Kurtit, tregon arsyen pse synon të bëhet deputete

Këngëtarja e njohur Edona Llalloshi ka vendosur t’i futet politikës.

Ajo synon të sigurojë një ulëse si ligjvënëse në Kuvendin e Kosovës, shkruan Indeksonline.
Pak më parë ajo ka bërë edhe reagimin e parë.

“Me kënaqësi, dua të ndaj me ju vendimin tim për të kandiduar si Deputete e Kuvendit të Republikës së Kosovës, duke u bërë pjesë e listës Lëvizja VETËVENDOSJE.”, ka shkruar mes tjerash Llalloshi.

Reagimi i saj i plotë:

Të dashur qytetarë të vendit tim
Publiku im i çmuar
Familjarë të dashur

Me kënaqësi, dua të ndaj me ju vendimin tim për të kandiduar si Deputete e Kuvendit të Republikës së Kosovës, duke u bërë pjesë e listës Lëvizja VETËVENDOSJE.
Duke qenë pjesë e një komuniteti të respektuar i cili ka dhënë kontribut në forma të ndryshme në ndërtimin e shoqërisë sonë kam vendosur që përmes përfaqësimit në Kuvend të kontribuoj për një të ardhme më premtuese për qytetarët tanë. Këtë, do të bëjmë bashkë me Kryeministrin Albin Kurti, dhe të zgjedhurit e tjerë nga populli.
Si artiste, jam krenare që në vazhdimësi kam pasur fatin të përfaqësoj kulturën e kombit tonë, të promovojë vlera kulturore e artistike dhe për këtë ju falënderoj më përulësi për vlerësimin tuaj.
Besoj fuqishëm se mund të krijojmë politika të cilat reflektojnë nevojat reale të të gjitha komuniteteve në Kosovë. Derisa, përkushtimi im, do të jetë adresimi i çështjeve që kanë të bëjnë me barazinë gjinore, dhunën në familje, kulturën dhe jo vetëm.

Ju ftoj të më bashkoheni në këtë rrugëtim, sepse vetëm bashkë sjellim ndryshimin që dëshirojmë.

E juaja
EDONA