E rëndë: Vdes në QKUK 22-vjeçarja që u godit nga vetura në rrugën Prishtinë – Ferizaj

Një aksident trafiku që u shkaktua javën e kaluar, në rrugën Prishtinë – Ferizaj, ku një veturë kishte goditur një 22-vjeçare, përfundoi me fatalitet. Vajza që mori lëndime të rënda, përkundër trajtimit ka humbur jetën.

Kështu kanë bërë të ditur burime nga Sinjali në Qendrën Klinike Universitare të Kosovës, që njoftuan se viktima ka ndërruar jetë sot, përkundër trajtimit mjekësor që mori në repartin intensiv.

Aksidenti kishte ndodhur në orët e mëngjesit të 22 dhjetorit, ku këmbësorja u përplas nga automjeti dhe pësoi lëndime të rënda, për çka ishte dërguar në QKUK, por fatkeqësisht nuk arriti t’u bëjë ballë plagëve dhe vdiq.

Pasi Policia mori informacionin nga spitali, njësitë përkatëse dolën në vendin e ngjarjes, teksa me urdhër të Prokurorit të Shtetit trupi i pajetë është dërguar në IML që t’i bëhet obduksioni.