Dyshohet për kontrabandim me migrantë, ndalohet një person në Ferizaj

Prokuroria Themelore në Ferizaj me vendim të prokurorit të Shtetit ka ndaluar në kohëzgjatje prej 48 orësh një person i cili dyshohet se ka kryer veprën penale “Kontrabandimi me migrantë” dhe “Mashtrimi”.

Sipas një njoftimi për media bëhet e ditur se i dyshuari është me inicialet F.H.

“Prokuroria Themelore në Ferizaj, departamenti për Krime të Rënda, me vendim të Prokurorit të Shtetit, ka ndaluar në kohëzgjatje prej 48-orësh,  një person të dyshuar me iniciale F.H., për shkak të dyshimit se i njëjti ka kryer veprat penale “Kontrabadimi me migrantë” nga neni 164 paragrafi 2 lidhur me paragrafin 1 të Kodit Penal të Republikës së Kosovës dhe “Mashtrimi” nga neni 323 paragrafi 1 të KPRK-së”, thuhet në njoftim.

Ndërkaq, tutje në njoftim thuhet se Prokuroria Themelore në Ferizaj, ndaj të dyshuarit të lartëcekur do të vazhdojë me procedura të mëtejme hetimore.