Dyshime se inskenoi aksidente, për të përfituar nga kompanitë e sigurimeve

Në 29 aksidente trafiku brenda dy viteve, është përfshirë një burrë rreth 40 vjeç nga Komuna e Prishtinës. Ai ka kërkuar kompensim në 9 kompani të sigurimeve. Kjo edhe ka bërë që të ngrihen dyshime për inskenim të aksidenteve në trafik, me qëllim të përfitimeve materiale.

Nga Byroja Kosovare e Sigurimit thonë se shuma e paguar nga kompanitë e sigurimeve gjatë vitit të kaluar për personat që kanë pësuar lëndime të lehta trupore nga aksidentet në trafik kapin vlerën e mbi 12 milionë e 324 eurove. Por cilët janë shembujt kur një person është përshirë madje edhe në dhjetëra aksidente?

Rasti 1

Një person ka paraqitur 16 kërkesa në 7 kompani të sigurimeve për një periudhe 2-vjeçare ku janë të përfshirë 6 persona.

Rasti 2

Një person ka paraqitur 18 kërkesa në 8 kompani të sigurimeve për një periudhe 5 vjeçare ku janë të përfshirë 3 persona.

Rasti 3

Një person ka paraqitur 20 kërkesa në 8 kompani të sigurimeve për një periudhe 1-vjeçare ku janë të përfshirë 3 persona.

Rasti 4

Një person ka paraqitur 22 kërkesa në 9 kompani të sigurimeve për një periudhe 3-vjeçare ku janë të përfshirë 6 persona.

Rasti 5

Një person ka paraqitur 29 kërkesa në 9 kompani të sigurimeve për një periudhe 2-vjeçare ku janë të përfshirë 5 persona.

Rasti 6

Një person ka paraqitur 19 kërkesa në 8 kompani të sigurimeve për një periudhe 2-vjeçare ku janë të përfshirë 2 persona.

Policia e Kosovës nuk ka dhënë sqarime për rastet konkrete por ka treguar statistika të përgjithshme të aksidenteve.

Nga policia kanë thënë se gjatë tremujorit të parë janë raportuar 3 mijë e 114 persona të lënduar nga aksidentet në trafik, 127 më shumë se periudhën e njëjtë të vitit të kaluar.

Qytetarët që kanë pësuar lëndime të lehta trupore janë referuar për kontrolle mjekësore në Qendrat e Mjekësisë Familjare.

 “Në qendrën tonë ka raste mirëpo nuk janë raste të shpeshta që kërkojnë ndihmë për aksidente. Kur ka lëndime të lehta trupore, trajtimin e marrin në qendrën tonë, mirëpo nëse kanë lëndime më të rënda thirret urgjenca dhe bëhet transporti për në qendrën emergjente”, ka thënë Ilire Bunjaku, doktoreshë familjare në QKMF.

Nga Byroja e Sigurimeve të Kosovës kanë treguar se kompanitë e sigurimeve kanë paguar mbi 30 milionë e 544 mijë euro për dëmet e shkaktuara në aksidentet në trafik gjatë 2022-s.