Dreçun: Kosova minon dialogun, e sjell atë në një gjendje vdekjeje klinike

Kryetari i të ashtuquajturit komision parlamentar serb për Kosovën dhe ish “analist” ushtarak i kriminelit të luftës, Sllobodan Millosheviq, Millovan Drecun, ka deklaruar pas raundit të ri të dialogut në Bruksel, se “Prishtina po tallet me gjithë procesin”, raporton portali i televizionit në shërbim të regjimit serb “TV Pink”.

“Prishtina po ndjek një rrugë që minon dialogun dhe e sjell atë në një gjendje të vdekjes klinike. Prishtina dëshiron të shmangë krijimin e Asociacionit. Ata duan të fusin draft statutin e tyre në lojë. Ata duan atje të japin “njëfarë lloji të vetëqeverisjes”. Tani kjo është çështja kryesore”, ka thënë Drecun.

Sipas fjalëve të tij, Kosova dëshiron të fusë në lojën politike atë që kryeministri i Kosovës Albin Kurti e ka paraqitur si vizion të tij.

“Ata duan të lënë anash gjithçka për çfarë është dakorduar në Marrëveshjen e Brukselit. Sipas tyre, vizioni “zbret në një pikë”, ku Kosova llogaritet si shtet, por se “ky është një mision i pamundur” që Beogradi të pranojë. Prishtina dëshiron që të na detyrojë që përsëri të hyjmë në negociata për Asociacionin, këto të gjitha  kemi dëgjuar nga zonja Power. Prishtina po sillet si tregtar. Ata po shpërblehen për sjelljen e tyre destruktive. Unë çuditem se si ka pranuar Lajçaku këtë takim. Kam “dëgjuar” se Bislimi nuk ka dashur të vijë në takim por se e kanë detyruar amerikanët”, ka deklaruar ish-propaganduesi i Millosheviqit, tani në shërbim të Vuçiqit, Millovan Drecun.