Draft-statuti i Ramës për Asociacionin, Qeveria: Nga Shqipëria zyrtare presim mbështetje, por ndërmjetësues kemi shumë

Zëdhënësi i Qeverisë së Kosovës, Perparim Kryeziu, ka komentuar draft-statutin për Asociacionin që kryeministri shqiptar Edi Rama ua dërgoi si propozim presidentit të Francës, Emanuel Macron, si dhe kancelarit të Gjermanisë, Olaf Scholz.

Ndonëse kërkoi mbështetjen e Shqipërisë, Kryeziu ka thënë se nuk kanë nevojë për një tjetër ndërmjetësues në procesin e dialogut, shkruan gazeta online Reporteri.net.

“Nga Shqipëria zyrtare presim mbështetje. Ndërmjetësues kemi shumë”, ka thënë Kryeziu në RTV Dukagjini.

Tutje, Kryeziu ka shtuar se çështja e kryetarëve në komunat veriore ka të bëjë me Kushtetutën dhe sundimin e ligjit.

“Çështja e kryetarëve të katër komunave në veri të vendit është çështje e respektimit të Kushtetutës, sundimit të ligjit dhe ofrimit të shërbimeve ndaj qytetarëve tanë, që për shkak të bojkotit të diktuar nga Serbia u kishin munguar për plot 6 muaj”, ka thënë ai.

Sipas tij, çështja e marrëveshjeve të mëhershme për asociacionin e komunave me shumicë serbe është “çështje e funksionalitetit të shtetit të Kosovës, dhe kjo u dëshmua me draftin e prezantuar nga Ekipi Menaxhues që drejtohej nga deputetja e Vuçiqit që synonte një Republika Srbska në Kosovë dhe së fundmi me Non-paperin e Akademisë së Shkencave dhe e Artit e Serbisë që flet për “Botën Serbe””.

“Në të dy rastet në pyetje është Kosova. Në të dy rastet rreziku është Serbia”, ka shtuar ai.