Lidhje Demokratike e Kosovës nga 1 qershori nis procesin e brendshëm zgjedhor.
Këtë e ka bërë të ditur sot kryetari i partisë, Lumir Abdixhiku, i cili tha se në vjeshtë partia duhet të ketë kryetarin e ri, teksa inkurajoi të kandidojnë për të parin e partisë, të gjithë ata që kanë plan e ide.
Lidhur me zgjedhjet e brendshme në LDK, për Gazeta Blic ka folur anëtari i kësaj partie, njëherësh ish deputet, Naser Rugova.
Ai thotë se gara për të parin e partisë do t’i ketë dy e më shumë kandidatë, duke shtuar LDK gjithmonë ka organizuar zgjedhje me konkurrencë të mirëfilltë.
“Ky është vit zgjedhor për LDĶ-në dhe pres një proces zgjedhor të hapur, fer dhe gjithëpërfshirës që do të nxjerr një lidership kredibil si vullnet i anëtarësisë. LDK gjithmonë ka organizuar zgjedhje me konkurrencë të mirëfilltë dhe sigurisht gara për të parin e LDK-së do të ketë dy e më shumë kandidatë”, thotë Rugova.
Ish deputeti vlerëson se zgjedhjet do të nxjerrin një lider kredibil të burmosur me filozofinë politike të LDK-së dhe vizion rugovian.
“LDK është parti emblematike, artikuluese e lirisë dhe pavarësisë së Kosovës. Një lider kredibil i brumosur me filozofinë politike të LDK-së dhe vizionin rugovian i duhet LDK-së dhe Kosovës. Besoj në një proces që do të nxjerr një lider me tipare të tilla”, deklaron Naser Rugova.