Deputetja Dumoshi dhe këshilltari i Kurtit deklarojnë pasurinë pas afatit të rregullt

Agjencia për Parandalimin e Korrupsionit (APK) ka publikuar listën e zyrtarëve publikë, të cilat nuk e kanë bërë deklarimin e pasurisë në afatin e rregullt vjetor dhe atyre që e kanë deklaruar pasurinë pas afatit të rregullt vjetor.

Sipas APK-së, tetë zyrtarë publik nuk e kanë deklaruar pasurinë sipas afatit të rregullt vjetor, ndërsa pesë prej tyre e kanë deklaruar pasurisë pas afatit vjetor.

Nga publikimi i AKP-së, vërehet se në listën e zyrtarëve publik të cilët e kanë deklaruar pasurinë pas afatit të rregullt është deputetja e LDK-së, Vlora Dumoshi dhe këshilltari politik i Kryeministrit Albin Kurti, Fatlum Sadiku.

Bashkë me Dumoshin dhe Sadikun, nga lista e subjekteve deklaruese që e kanë deklaruar pasurinë pas afatit të rregullt vjetor, janë edhe: Erleta Qestaj (Këshilltare e Kuvendit Komunal në Junik), Arta Shehu (anëtare e Këshillit Drejtues të Universitetit “Hasan Prishtina” në Prishtinë), Abdyl Gashi (Këshilltar i Kuvendit Komunal në Novobërdë).

Ndërsa, në listën e subjekteve të cilat nuk e kanë bërë deklarimin e pasurisë në afatin e rregullt vjetor janë edhe: Hamid Zukaj (Këshilltar i Kuvendit Komunal në Deçan), Hekuran Hoxha (Këshilltar i Kuvendit Komunal në Gjakovë), Florin Dreshaj (Këshilltar i Kuvendit Komunal në Istog), Isuf Dedushaj (anëtar në Këshillin e Shkencës në Ministrinë e Arsimit Shkencës dhe Teknologjisë), Kushtrim Kozmaqi (zëdhënës- udhëheqës i divizionit për buxhet dhe financa në MASHT), Nijazi Halili (anëtar i Këshillit Shkencor për Shkenca Ekonomike dhe Sociale në MASHT), Daut Demaku (Këshilltar i jashtëm politik në Ministrinë e Bujqësisë, Pylltarisë dhe Zhvillimit Rural) si dhe Gani Kastrati (auditor i brendshëm në Ministrinë e Punëve të Brendshme).

Kodi Penal i Republikës së Kosovës, parasheh veprën penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, e cila vepër penale konsiderohet se është kryer nëse zyrtarët publik nuk paraqesin deklaratën brenda afatit për paraqitjen e deklaratës.

Kjo vepër penale, sipas nenit 430, paragrafi 1, dënohet me gjobë ose me burgim deri në tre (3) vjet.