Demi: Me këtë Qeveri nuk mundesh me u marrë vesh as rreth fakteve

Agron Demi nga Insituti GAP, përmes një shkrimi në llogarinë e tij në Facebook, ka shkruar rreth ndarjes buxhetore që Qeveria ndanë për komunat për projekte kapitale.

Demi thotë se të gjitha subjektet politike që kanë qeverisur kanë dërguar më shumë buxhet tek komunat që qeverisnin partitë pushtet. Njejtë sipas tij po bën edhe Lëvizja Vetëvendosje.

Ai shton se më së shumti që i kanë cituar raportet e tyre kanë qenë deputetët e Vetëvendosjes si opozitë, mirëpo sipas tij, tani të njejtit po mundohen të denigrojnë GAP-in.

“Këtë javë GAP e dëshmoi të njejtën tendencë edhe nga Qeveria e VV. Nga e diela janë qu i madh e i vogël (kryesisht të vegjlit) me denigru GAP (qëllimshëm s’po them kritiku, se kritika e ka njëfar baze e arsyetimi)”, ka shkruar Demi, që sipas tij me Qeverinë e VV-së nuk mund të ketë dakord as sa i përket fakteve.

“Gjithnjë e më shumë po dëshmohet se me këtë Qeveri nuk mundesh me u mar vesh as rreth fakteve. “Gjithkush ka të drejtë të ketë opinionin e tij/saj, por jo gjithkush ka të drejtë të ketë edhe faktet e tij/saj”. E fakt është që kjo Qeveri, sikurse ato që i ka kritiku ma herët, mbi gjysmën e investimeve të reja kapitale nga niveli qendror në atë lokal i ka orientu në komunat që qeverisen nga VV”, ka thënë Demi.

“Kjo Qeveri po operon me “fakte alternative”, term që u ba i njohur nga këshilltarët e Trump, e që nënkupton që për çdo kritikë që bazohet në fakte, me ju kundërpërgjigjë me disa “fakte alternative”, e që janë të dhëna të shpikura, vetëm e vetëm me kriju konfuzion dhe me e mbajtë në iluzione masën mbështetëse”, ka përfunduar ai.