Deklarohet Policia për sulmin në Ibër Lepenc: I qëllimshëm, kemi rritur masën e sigurisë – janë njoftuar institucionet ndërkombëtare

Policia e Kosovës ka dalë me detaje lidhur me sulmin e rëndë në shpërthimin që ka ndodhur në kanalin kryesor të Ibër Lepencit, duke njoftuar se pas hetimeve intensive dhe ekzaminimeve në vendin e ngjarjes, është konstatuar se shpërthimi/detonimi ka qenë sulm i qëllimshëm, raporton GazetaDemos.

“Nga Policia e Kosovës dhe institucionet kompetente, janë ndërmarrë masat e nevojshme të sigurisë, të ndalimit të rrjedhjes së ujit si dhe mundësisë së sanimit të kanalit të ujit. Njëkohësisht nga Policia e Kosovës, njësia për trajtimin e materieve eksplozive janë duke u kryer hetime intensive dhe ekzaminime në vendin e ngjarjes, nga të cilat është konstatuar se shpërthimi/detonimi ka qenë sulm i qëllimshëm, akt kriminal terrorist i kryer nga person/a të dyshuar”, thuhet në njoftim.

PK po ashtu deklaroi se ka rritur masën e sigurisë, e po ashtoi shtoi se lidhur me rastin janë njoftuar edhe institucionet ndërkombëtare të sigurisë.

“Policia e Kosovës, ka rritur masat e sigurisë në lokacionet sensitive dhe do të vazhdojë të punojë intensivisht drejt zbardhjes dhe ndriçimit të rastit, për të cilin nga hetimet fillestare ekziston dyshimi i bazuar se sulmi ka qenë i qëllimshëm dhe i kryer me eksploziv nga individ apo grup kriminal, duke shkaktuar dëme të mëdha materiale. Policia e Kosovës do të përdorë të gjitha aftësitë dhe asistencën nga komuniteti ndërkombëtar për të hetuar provat dhe për të gjetur personat përgjegjës për dëmtimin e furnizimit me ujë të vendit, të furnizimit të termocentraleve e të Zubin Potokut, e që mund të dëmtojë qytetarët”, tha PK.

Në fund të reagimit, Policia pati edhe një kërkesë për qytetarët, ku thuhet;

“Nëse qytetarët kanë ndonjë informacion apo dinë diçka, iu lutemi të lajmërojnë në stacionin më të afërt të Policisë ose në mënyrë anonime duke përdorur numrat kontaktues: 192, 080019999, 038 550 999 dhe në info@kosovopolice.com”.