Daut Haradinaj: S’e votoj Limajn për kryeparlamentar

Deputeti i Aleancës për Ardhmërinë e Kosovës, Daut Haradinaj ka thënë se nuk do ta votonte emrin e Fatmir Limajt, nëse propozohet për kryeparlamentarnga Vetëvendosje.

“Unë personalisht nuk e votoj. Edhe e them publikisht. Jo për naj arsye po për qata që më the: A të ka mbet hatri? Po. Sikur ta ketë trajtuar më me kujdes qit “divorcin”. Përndryshe nuk ish dashtë edhe me mendu z.Limaj me kërku votën te AAK-ja. E vetmja mënyrë për të marrë z. Limaj votën e Daut Haradinaj është nëse ai është pjesë e koalicionit opozitar.”, tha Haradinaj në Dukagjini.

Haradinaj e ka komentuar edhe deklaratën e kryeministrit në detyrë, Albin Kurti, i cili foli për rikthimin e Fatmir Limajt në Kuvend, duke thënë se pa përfshirjen e Nismës, AAK nuk do të kishte arritur të kalojë pragun zgjedhor në zgjedhjet e fundit.

Sipas Haradinajt, Kurti është duke “iu servilosur” Limajt.

“E para është kryeministër, shumë më mirë do të ishte me u marrë me përgjegjësitë që i ka marrë edhe si kryetar i VV-së, edhe si përgjegjës për nominimin e kryetares së Kuvendit. Më shumë do t’i bënte nder vetit kryeministri po që se do ishte i fokusuar drejt kësaj teme. Dhe nuk do ta kishte terrorizuar shoqërinë me 20 seanca, duke e ditur epilogun. Kur Kosova thuajse është në një gjendje shumë kritike…

Dhe kryeministri del aty si falltore, e na tregon se kush kujt i ndihmoi. Mendoj që nuk është punë e tij. Është një servilosje ndaj zotit Limaj, pas 20 vjetësh ofendime, sharje e akuza që i ka bërë vetë zoti Kurti”, ka thënë Haradinaj në Debat Plus.