​“Dardanët” mbështesin fuqishëm kombëtaren: “Me Kosovën. Pranë Kosovës!”

Kombëtarja e Kosovës në futboll po vazhdon të përgatitet për dy ndeshjet e radhës në kuadër të Ligës së Kombeve ku do të ballafaqohet me Irlandën Veriore dhe me Qipron.

Në mbështetje të futbollistëve sot ishte edhe Presidenti i Federatës së Futbollit të Kosovës, po edhe një numër grupit të tifozëve “Dardanët” të cilët në fund bënë një foto të përbashkët me lojtarët në stadiumin “Fadil Vokrri”.

Pas kësaj, kryetari i tifogupit “Dardanët” ka dal me një shkrim në “Facebook” ku ka shprehur mbështetjen e fuqishme për ekipin.

Ky është shkrimi i plotë i tij:

Këtu edhe kur të tjerët kishin alternativa tjera rezervë. Këtu edhe sot. Këtu do të jem përherë unë si lider i Dardanëve dhe të gjithë anëtarët e grupit, pa dallim.

Nuk përçahemi. Nuk na ndanë njeri. E vetmja gjë që na bashkon është dashuria për Kosovën. Atë e kemi treguar vazhdimisht.

Falë angazhimit tonë për t’i shmangur ekseset në stadium, kemi bërë që “Fadil Vokrrit” t’i rikthehen familjet e tëra: gratë, fëmijët – të gjithë, pa përjashtim.

Sharjet i zëvendësuam me një hapje për të gjithë ata që ndjejnë dashuri ndaj Kosovës dhe shprehin dëshirë ta përkrahin atë. Kjo qasje bëri të mundur të jemi tifogrupi i vetëm në rajon, ku institucioneve tona nuk u jemi bërë barrë, duke mos prodhuar ndonjë skandal apo duke mos shkaktuar pranim dënimesh të mëdha nga UEFA dhe FIFA për ndeshjet që jemi organizuar.

Kështu, të bashkuar, me qëllimin e vetëm për t’i qëndruar afër Kosovës, paralajmërojmë udhëtimin në Irlandën Veriore. Dardanët ashtu siç kanë qenë në çdo kënd të botës për t’i dhënë mbështetje lojtarëve, ashtu do të jenë edhe në dy ndeshjet e radhës.

Atmosferë, organizim dhe bashkim – do të veçohen në dy ndeshjet e radhës nga tifogrupi ynë. Zotohemi që do t’i qëndrojmë përkrah Kosovës në çdo sfidë të saj, edhe kur ajo është në vështirësi.

Kështu kemi bërë gjithmonë. Kështu e kemi nisur, pak veta, por duke besuar. Kështu do të vazhdojmë, me lidershipin e njëjtë, pa u dorëzuar ose demoralizuar.

Jemi Dardanët. Jemi mburoja e këtij ekipi kombëtar të Kosovës.

Besa, besë!