Albanian
Croatian
English
French
German
Serbian
Turkish
Ish-ndërmjetësi britanik në dialogun teknik ndërmjet Kosovës dhe Serbisë, Robert Cooper e ka akuzuar Serbinë për moszbatimin e Marrëveshjes me Kosovën. Sipas Cooper, Serbia duke e kundërshtuar Marrëveshjen e Ohrit që të jetë pjesë e Kapitullit 35, po mbyll derën e anëtarësimit në Bashkimin Evropian.
Me këtë qëndrim diplomati britanik në pension reagoi ndaj pretendimit të presidentit serb, Aleksandar Vuçiq, se përfshirja në kornizën e negociatave të dokumenteve të dakorduara mes Kosovës dhe Serbisë në gjysmën e parë të vitit 2023, do të thotë se BE po ia mbyll derën Serbisë, shkruajnë mediet serbe duke u thirrur në një kronikë të Zërit të Amerikës.
“Bashkimi Evropian nuk dëshiron të jetë pjesë e problemit, por do që ta zgjidhë atë. Misioni i tij është që të gjithë anëtarët e unionit të kenë një lloj marrëdhënieje, jo normale, por supernormale me fqinjët e tyre”, tha Cooper, i cili ndërmjetësoi dialogun teknik ndërmjet Kosovës dhe Serbisë në periudhën 2011-2012.
Kapitulli 35 i negociatave për anëtarësim të Serbisë përfshin marrëdhëniet fqinjësore, pra rregullimin e marrëdhënieve me Kosovën.
“Ideja për ta futur Serbinë në Bashkimin Evropian, ndërkohë që refuzon të njohë pavarësinë e fqinjit të saj dhe ta pranojë atë si një shtet më vete, nuk është në thelb të BE-së. Kjo do të forconte ndarjet ndërmjet Serbisë dhe Kosovës. Ajo që duam është që ato ndarje të zhduken”, ka deklaruar Cooper.
Në samitin e liderëve evropianë në fund të javës së ardhshme, Këshilli Evropian duhet të shpallë konkluzionet për zgjerim ku përfshihen edhe vendet e Ballkanit Perëndimor.
“Është gjithashtu e nevojshme të theksohet se Serbia aktualisht nuk vepron si një kandidate e besueshme për anëtarësim në Bashkimin Evropian. I mjafton një Viktor Orban. Serbia është një demokraci në formë, por a është ajo në realitet… A janë media të lira dhe a kanë të gjithë akces të barabartë në të… A do ta pasojë një parti tjetër partinë në pushtet në të ardhmen e afërt? Unë do të thosha jo”, thotë Cooper.