Sociologu Albert Mecini në emisionin “Frontal” të T7, ka folur lidhur me rastet e shumta të vrasjeve, rrahjeve dhe dhunës në Kosovë.
“Është ajo që ideja që menjëherë pas luftës në vend se të ndërtoehmi si shtet i së drejtëse, ne besuam në diçka tjetër, që secili të arrijë sa më shpejtë te pasuria. Më pas njerëzit filluan të humbasin besimin në institucionet e drejtësisë dhe te ideja se ne jemi duke e parë shoqërinë dhe shtetin si diçka të përkohshme. Nuk ka kohezion social, në kuptimin e solidaritetit”, tha ai.
“Ne jemi duke jetuar në një shtet të ri, që krizat e vazhdueshme politike na kanë marrë shumë energji, duke na larguar vetëdijen nga gjëra më të rëndësishme. Është dëshmuar me statistika që shumë njerëz në Kosovë mbajnë armë”, tha Mecini.
Ndërkaq, eksperti i sigurisë, Fatmir Çollaku, ka folur për prezencën e armëve, e sidomos atyre pa leje.
“Prezenca e armëve është dukuri përcjellëse pas luftës në Kosovë. Ka rënë shifra e armëve pa leje”, tha Çollaku.
Sociologu Mecini tha se nuk mund të krahasohet Kosova me vendet tjera.
“Kosova nuk mundet me u krahasu me vendet tjera. Në vendet perëndimore ka krime serike etj, por nuk janë ato krime akute, aty për aty, që skane mundur të merren vesh për një parking. Natyra e krimit nuk është e njëjtë, te ne është banale”, deklaroi Mecini.
Ai ka folur edhe atë se sa ka ndikuar lufta e fundit në Kosovë tek këto raste të shumta të krimeve.
“Traumat në vazhdimësi të përcillen, nuk kemi arritur të krijojmë besim të ndërsjell qytetar, kjo është mangësia më e madhe. Jemi fokusuar më shumë në arritjen e pasurisë”, u shpreh ai.
Mecini tha se siguria në Kosovë është e cenueshme.