CNN: Vlerësimi i inteligjencës amerikane sugjeron se sulmet ndaj Iranit nuk shkatërruan objektet bërthamore

Sulmet ajrore të ushtrisë amerikane ndaj tri objekteve bërthamore iraniane fundjavën e kaluar nuk i shkatërruan komponentët kryesorë të programit bërthamor të Iranit dhe sipas një vlerësimi të hershëm të inteligjencës amerikane, me gjasë vetëm e kanë vonuar për disa muaj, raportoi CNNduke iu referuar tre personave të informuar mbi këtë vlerësim.

Ky vlerësim, i cili nuk është raportuar më parë, është hartuar nga Agjencia e Inteligjencës së Mbrojtjes (DIA), krahu informativ i Pentagonit. Ai bazohet në një vlerësim të dëmeve nga beteja i kryer nga Komanda Qendrore e SHBA pas sulmeve, tha një prej burimeve.

Analiza mbi dëmet në këto objekte dhe ndikimin e sulmeve ndaj ambicieve bërthamore të Iranit është ende në zhvillim dhe mund të ndryshojë ndërsa mbledhen më shumë të dhëna.

Por gjetjet fillestare, sipas CNN, janë në kundërshtim me pretendimet e përsëritura të Presidentit Donald Trump se sulmet “i shkatërruan plotësisht” objektet iraniane të pasurimit bërthamor. Edhe Sekretari i Mbrojtjes, Pete Hegseth, deklaroi të dielën se “ambiciet bërthamore të Iranit janë fshirë nga faqja e dheut.”

Dy nga personat e njohur me vlerësimin i thanë CNN se rezerva e uraniumit të pasuruar e Iranit nuk është shkatërruar. Njëri prej tyre tha se centrifugat janë në masë të madhe “të paprekura”.

“Sipas vlerësimit të DIA, SHBA i ka shtyrë mbrapa vetëm për disa muaj, në rastin më të mirë,” shtoi ai.

Shtëpia e Bardhë e ka pranuar ekzistencën e këtij vlerësimi, por është shprehur në kundërshtim me të, shkroi CNN.