CNN: Tanket ruse dhe dy batalione ndodhen në Ukrainë

CNN raporton se trupat ruse janë futur tashmë në rajonin lindor të Ukrainës që Rusia e ka njohur si “të pavarur”, sipas kryeministrit të Letonisë dhe burimeve të njohura me vlerësimet e fundit të inteligjencës amerikane.

“Sipas informacionit që kam në dispozicion, Putini po lëviz forca dhe tanke shtesë në territoret e pushtuara të Donbasit”, tha kryeministri letonez Arturs Krišjānis Kariņš.

“Sipas çdo përkufizimi, kjo është një pushtim i territorit sovran të një vendi fqinj.”

I pyetur nga CNN nëse e kishte fjalën për trupa shtesë të ushtrisë ruse përveç atyre që njihen si separatistë, Kariņš u përgjigj: “Po, sipas informacionit që kam në dispozicion, kjo është pikërisht ajo që po shohim”.

Dy burime të tjera të njohura me inteligjencën amerikane konfirmuan për CNN se trupa shtesë ruse në fakt kanë kaluar kufirin në rajonin e Donbasit që kur presidenti rus Vladimir Putin njohu dy rajonet dhe lëshoi ​​një urdhër për vendosjen e “paqeruajtësve” në Donbas të martën.

Sipas një zyrtari të lartë të inteligjencës amerikane rusia ka dislokuar në këtë territor dy batalione me nga rreth 800 ushtarë secila, krahas tankeve.

Presidenti Joe Biden i përshkroi të martën ngjarjet që po ndodhin në Ukrainë si “fillimi i një pushtimi rus”, por zyrtarë të lartë të administratës kanë refuzuar që atëherë të konfirmojnë nëse trupa shtesë ruse kishin hyrë në Donbas – ku forcat ruse kanë mbështetur luftëtarët separatistë që nga viti 2014.