Çka dihet për aksidentin hekurudhor në Spanjë?

Të paktën 40 persona kanë humbur jetën dhe dhjetëra të tjerë janë plagosur pasi dy trena me shpejtësi të lartë u përplasën pranë Kordobës, në jug të Spanjës, të dielën vonë, në një nga aksidentet më të rënda hekurudhore të vendit në më shumë se një dekadë.

Aksidenti ndodhi pranë qytetit të vogël Adamuz, rreth 360 kilometra në jug të Madridit. Sipas autoriteteve, një tren në drejtim të veriut, i operuar nga kompania private Iryo dhe që udhëtonte nga Malaga drejt Madridit, u godit në pjesën e pasme nga një tren në drejtim të jugut, i operuar nga kompania shtetërore Renfe, në linjën Madrid–Huelva. Përplasja bëri që të dy trenat të dilnin nga shinat dhe të përmbyseshin, shkruan CNN.

Kreu i qeverisë rajonale të Andaluzisë, Juan Manuel Moreno, tha se 40 persona kanë vdekur, ndërsa 41 të tjerë mbeten të shtruar në spital. Familjarë të pasagjerëve u mblodhën në Spitalin Reina Sofía në Kordobë në kërkim të informacionit për të afërmit e tyre.

Të mbijetuarit kanë përshkruar skena paniku dhe shkatërrimi. Rocío Flores, e cila ndodhej në trenin në drejtim të jugut, tha se pas përplasjes “u hodhëm në ajër”. Një tjetër pasagjere, Ana, tregoi se treni “u përmbys në njërën anë” dhe se dëgjoheshin vetëm britma, ndërsa ajo u nxor nga vagoni e mbuluar me gjak.

Banorë lokalë iu bashkuan ekipeve të emergjencës për të ndihmuar të plagosurit. Autoritetet thanë se disa pasagjerë u detyruan të dilnin nga dritaret ose përmes çatisë së vagonëve.

Kryeministri i Spanjës, Pedro Sánchez, vizitoi vendin e aksidentit dhe shpalli tre ditë zie kombëtare. Ai premtoi se shkaqet e përplasjes do të hetohen dhe se publiku do të informohet “me transparencë të plotë”. Sánchez anuloi gjithashtu pjesëmarrjen e tij në Forumin Ekonomik Botëror në Davos.

Ministri i Transportit, Óscar Puente, e cilësoi aksidentin si “jashtëzakonisht të pazakontë”, duke theksuar se ndodhi në një segment të drejtë të linjës hekurudhore që ishte rinovuar së fundmi. Presidenti i Renfe tha se trenat po udhëtonin nën kufirin e lejuar të shpejtësisë dhe se sistemi i sinjalizimit parandalon tejkalimin e saj.

Sindikata e makinistëve të trenave ka ngritur më herët shqetësime për shpejtësitë e larta dhe ndikimin e tyre në infrastrukturë, ndërsa ekspertët thonë se është ende herët për të përcaktuar shkaqet e sakta të aksidentit.

Ky është aksidenti më i rëndë hekurudhor në Spanjë që nga viti 2013, kur 79 persona humbën jetën në Galicia.