Çitaku: VV-ja dëshiron diktat dhe nënshtrim, por PDK-ja nuk i nënshtrohet Kurtit

Deputetja e Partisë Demokratike të Kosovës, Vlora Çitaku, ka reaguar pas dështimit të radhës për konstituimin e Kuvendit të Kosovës, duke akuzuar drejtpërdrejt kryeministrin në detyrë, Albin Kurti, dhe ministren Albulena Haxhiu për bllokimin institucional.

“Nuk ka fije logjike që institucionet e Republikës së Kosovës të mos konstituohen, në mënyrë që të jemi në gjendje të adresojmë sfida të shumta, halle të shumta të qytetarëve, për shkak të kryeneçësisë së zotit Kurti dhe ambicies së zonjës Haxhiu. Kosova është shumë më e madhe dhe më e rëndësishme sesa secili prej nesh”, tha Çitaku.

Deputetja theksoi se PDK-ja ka ofruar zgjidhje, por se sipas saj Lëvizja Vetëvendosje po refuzon çdo bashkëpunim institucional.

“Vërtet kjo nuk ka asnjë logjikë. Ne kërkojmë dhe kemi ofruar zgjidhje, mirëpo LVV-ja nuk do bashkëpunim, nuk do bashkërendim. Lëvizja Vetëvendosje do diktat dhe nënshtrim, e PDK-ja nuk i nënshtrohet diktatit të Albin Kurtit.”

Sot është shënuar dështimi i 34-të me radhë për konstituimin e Kuvendit, pasi grupet parlamentare sërish refuzuan të propozojnë emrat për Komisionin për votim të fshehtë dhe Albulena Haxhiu nuk arriti të sigurojë votat për t’u zgjedhur kryetare e Kuvendit.