Albanian
Croatian
English
French
German
Serbian
Turkish
Përveç një regjimi ushqimor të balancuar dhe të shëndetshëm, gjatë muajve të nxehtë të verës, disa vitamina specifike janë veçanërisht të rëndësishme për mirëqenien e trupit. Ekspertët botërorë të shëndetit theksojnë se vitaminat e caktuara luajnë rol kyç në mbrojtjen dhe forcimin e organizmit gjatë kësaj periudhe.
Vitamina A
E njohur për ndikimin që ka në formimin dhe mirëmbajtjen e lëkurës, dhëmbëve, indeve skeletore dhe membranave të mukozës, vitamina A është thelbësore gjatë verës – sidomos për lëkurën. Meqenëse gjatë kësaj stine qëndrojmë më shumë jashtë, është e rëndësishme të kujdesemi për shëndetin e lëkurës. Mungesa e kësaj vitamine është e rrallë, por në raste të caktuara mund të kërkohet suplementimi.
Vitamina C
Kjo vitaminë funksionon si një antioksidant i fuqishëm që ndihmon në mbrojtjen e qelizave nga dëmtimi i radikaleve të lira. Ajo forcon imunitetin – veçanërisht të nevojshëm në verë, kur udhëtimet e shumta dhe temperaturat ekstreme mund të lodhin trupin dhe ta bëjnë më të ndjeshëm ndaj ftohjes dhe gripit. Marrja e rregullt e vitaminës C ndihmon në parandalimin e këtyre gjendjeve.
Vitamina D
E quajtur shpesh “vitamina e diellit”, ajo prodhohet natyrshëm nga trupi kur lëkura ekspozohet në rrezet e diellit. Por, prodhimi i saj nuk është gjithmonë i mjaftueshëm apo i barabartë. Koha e ditës, ndotja e ajrit, mosha, ngjyra e lëkurës dhe përdorimi i kremit mbrojtës janë faktorë që ndikojnë në përthithjen e saj. Prandaj, është e këshillueshme që përveç qëndrimit në diell, të konsumohen edhe ushqime të pasura apo të fortifikuara me këtë vitaminë, apo edhe suplemente në rast nevoje.
Vitamina E
Me efekt të fuqishëm antioksidant, vitamina E ndihmon në neutralizimin e radikaleve të lira dhe në mbrojtjen e lëkurës nga dëmtimet. Ajo nxit prodhimin e kolagjenit, i cili është esencial për elasticitetin e lëkurës – veçanërisht të nevojshëm gjatë verës, kur lëkura ekspozohet më shumë ndaj thatësisë dhe rrezeve të diellit. Po ashtu, vitamina E ndihmon edhe në forcimin e sistemit imunitar duke luftuar mikrobet.