Cilat janë zonat që mund të goditen me tërmet 6.5 shkallë në Kosovë?

Kosova ndodhet në një zonë sizmike të lartë, ku është e mundur që tërmete me fuqi deri në 6.5 shkallë të rihterit të ndodhin në të ardhmen.

Kështu ka vlerësuar udhëheqësi i Rrjetit Sizmologjik të Kosovës, Shemsi Mustafa, teksa ka folur për rrezikun e tërmeteve në Kosovë.

Sipas hartës së rrezikut sizmik të përpiluar në vitin 2009, Mustafa ka thënë se ka një probabilitet prej 75 për qind për tërmete të fuqisë 6.5 në disa zona të Kosovës, me një periudhë përsëritëse prej 95 vitesh.

“Kosova gjendet në një zonë sizmike relativisht të lartë që në të ardhmen sipas hartës së rrezikut sizmik që është përpiluar në vitin 2009, mund të priten tërmete të fuqisë me 6.5 të shkallës së rihterit në disa zona, me probabilitet 75 për qind, me periudhë përsëritëse 95 vite. Ashtu edhe të gjitha zonat sipas hartës së rrezikut sizmik, sepse janë një studim i të gjitha parametrave, parametri kryesor është katalogu historik domethënë zonat që janë goditur në të kaluarën më tërmete më të fuqishme pastaj është formacioni gjeologjik , është tektonika, sizma tektonika dhe topografia, e krijuar nga presioni i madh”, ka deklaruar ai.

Ai ka bërë të ditur se zona e veriut të Kosovës, zona e Dukagjinit deri në Prizren dhe zona e Ferizajt, Viti dhe Gjilanit janë ato që mund të goditen më shumë nga një tërmet i tillë.

Mustafa ka theksuar se shkalla e shkatërrimit nga një tërmet si ky varet nga cilësia e ndërtimit dhe materialeve të përdorura.

“Janë tri zona që mund të goditën më një tërmet maksimal, 6.5 shkallë e rihterit siç është zona veriore e Kosovës, zona e Dukagjinit komplet duke filluar nga Istogi deri në Prizren dhe zona Ferizaj, Viti Gjilan. Konsiderohet tërmet i fuqishëm, dhe sa i përballojnë ndërtimet kjo varet sesi janë projektuar dhe si janë ndërtuar e se çfarë cilësie materiali ka qenë”, ka deklaruar Mustafa.

Ai ka shtuar se pas luftës në Kosovë, ka pasur një periudhë të ndërtimit të papërshtatshëm dhe të pakontrolluar, duke e bërë situatën edhe më të rrezikshme.