​Christian Schmid: Veprimet e Republikës Serbe sugjerojnë shkëputje

Përfaqësuesi i Lartë për Bosnjë dhe Hercegovinë, Christian Schmidt, informoi Këshillin e Sigurimit të Kombeve të Bashkuara se Republika Serbe me veprimet e saj po rrezikon paqen dhe Marrëveshjen e Dejtonit, duke paralajmëruar se ky është një kërcënim për stabilitetin e të gjithë rajonit.

Përfaqësuesit e lartë të bashkësisë ndërkombëtare për Bosnjë-Hercegovinën janë të detyruar t’i raportojnë Këshillit të Sigurimit të OKB-së çdo gjashtë muaj për situatën në vend dhe ky është dokumenti i 67-të i dërguar në selinë e Kombeve të Bashkuara, i teti gjatë mandatit të Schmidt.

Ky raport duhet të jetë një pikë e rendit të ditës në takimin e Këshillit të Sigurimit të OKB-së të planifikuar për 6 maj.

Së bashku me Schmidt, në punën e tij planifikon të marrë pjesë edhe Zhelka Cvijanoviq, kryetare e Presidencës së BeH-së dhe bashkëpunëtore e ngushtë e Milorad Dodik, ndaj pritet që ata të dy të paraqesin vlerësime krejtësisht të kundërta për situatën në BeH.

Cvijanoviq është nën sanksionet e SHBA-së dhe i ndalohet të udhëtojë në SHBA, por ajo arriti të merr një vizë afatshkurtër për të vizituar selinë e OKB-së, të cilën autoritetet amerikane ndonjëherë ua lëshojnë politikanëve nga vendet problematike si Irani dhe Rusia.

Dodik u dënua me një vit burg për mosbindje ndaj vendimeve të Përfaqësuesit të Lartë, pas së cilës Republika Serbe intensifikoi sulmin ndaj rendit kushtetues të BeH duke miratuar ligje që përpiqen të pengojnë funksionimin e organeve të policisë shtetërore dhe organeve të drejtësisë shtetërore.

“Miratimi i një ligji në Asamblenë Kombëtare të RS që ndalon punën e institucioneve gjyqësore dhe organeve të zbatimit të ligjit në nivel shtetëror në territorin e RS lë të kuptohet për një shkëputje de fakto,” thuhet në raport.

Schmidt e sheh përpjekjen e Dodikut për ta bërë RS të miratojë një kushtetutë të re që do t’i jepte njësisë kompetenca që tani i përkasin shtetit si veçanërisht të rrezikshme.

Ai paralajmëroi bllokadën e Qeverisë në BeH për shkak të shantazhit të bërë nga partia e Dodikut dhe vuri në dukje se për shkak të ndikimit të saj është e vështirë të zbatohet rindërtimi i Këshillit të Ministrave të BeH-së, raporton KosovaPress.