Çfarë duhet të dinë të huajt në Zvicër për opsionet e kurseve të gjuhës

Pavarësisht nëse jetoni në pjesën gjermane, franceze ose italiane të Zvicrës, mësimi i gjuhës lokale është një domosdoshmëri. Por a ia vlejnë shpenzimet kurset e gjuhës?

Nëse planifikoni të jetoni për një kohë në Zvicër, ose të qëndroni këtu për një kohë të gjatë, atëherë duhet të zotëroni gjuhën zyrtare të kantonit tuaj.

Njohja e gjuhës lokale jo vetëm që do t’jua bëjë jetën më të lehtë si nga pikëpamja sociale ashtu edhe nga ajo profesionale, por është gjithashtu një kërkesë për marrjen (dhe rinovimin) e lejeve të punës dhe të shtetësisë, shkruan The Local, transmeton albinfo.ch.

(Natyrisht, njerëzit që vijnë nga Franca, Italia, Gjermania ose Austria kanë një avantazh të madh ndaj atyre nga vende të tjera, pasi nuk duhet të provojnë aftësitë e tyre ashtu siç duhet të huajt e tjerë.)

Si për kujtesë, Zvicra i mbështet kërkesat e saj në Kuadrin e Përbashkët Evropian të Referencës (CEFR), një përkufizim i niveleve të ndryshme gjuhësore të shkruar nga Këshilli i Evropës.

Niveli i kërkuar, sipas Sekretariatit Shtetëror për Migracionin (SEM), “dallon midis aftësisë së gjuhës me gojë dhe të shkruar”, me kërkesën për aftësi në të folur më të lartë se për atë të shkruar.

Kjo sepse komunikimi oral konsiderohet më i rëndësishëm për integrimin në jetën e punës dhe atë shoqërore.

Sidoqoftë, kini parasysh se nivelet e SEM janë një kërkesë minimale dhe disa kantone mund të kenë kritere më të rrepta.

Cilat janë opsionet tuaja më të mira për të mësuar një nga gjuhët kombëtare?

Ka shumë shkolla, por shumë janë mjaft të shtrenjta, ku mund të prisni të shpenzoni mijëra franga çdo muaj.

Por ka edhe alternativa më të lira – ndryshimi i vetëm midis tyre dhe atyre më të kushtueshme është shpesh madhësia e klasave – sa më pak studentë, aq më të shtrenjta janë kurset dhe anasjelltas.

Ndër kurset e gjuhës më të njohura dhe me çmime të arsyeshme janë ato në Migros Klubschule / Ecole Club Migros.

Po, Migros është rrjeti më i madh i supermarketeve në vend, por gjithashtu operon mbi 50 shkolla në të gjithë Zvicrën ku mund të mësoni jo vetëm një shumëllojshmëri të gjuhëve ‘zvicerane’ dhe të huaja, por edhe të merrni kurse të tjera, si joga, qeramikë, gatim, fotografi, dhe madje edhe yodeling.