Buja premton investime në infrastrukturën e Shpellës së Gadimes: Do ta bëjmë lidhjen e saj me Prishtinë e aeroport

Kandidati i Partisë Demokratike të Kosovës për kryetar të komunës së Lipjanit, Shkuri Buja e ka kthyer sërish vëmendjen te një prej mrekullive natyrore të Kosovës, Shpellën e Gadimes.

Ai vlerëson se e njëjta është mundësi e madhe që e ka vendi, e që duhet ta shfrytëzojë fshati Gadime si dhe gjithë qyteti i Lipjanit, për zhvillimin ekonomik e turistik.

Me këtë rast, Buja ka shprehur vizionin e tij për Gadimen, për ta bërë një destinacion të denjë për t’u vizituar nga turistë nga mbarë bota dhe për të krijuar vende të reja pune për banorët aty.

Buja ka thënë se do të mbështesin bujtinat, produktet vendore dhe nismat e ekoturizmit.

“Në mandatin e ardhshëm, do të investojmë në infrastrukturë moderne, lidhjen e shpellës me Prishtinën e aeroportin, promovimin e saj në rrjete sociale dhe në tregun ndërkombëtar, si dhe krijimin e guidave profesionale për vizitorë vendorë e të huaj. Do të mbështesim bujtinat, produktet vendore dhe nismat e ekoturizmit, duke hapur mundësi të reja për bizneset lokale. Shpella e Gadimes do të kthehet në qendër edukimi e shkence, përmes vizitave shkollore, kërkimeve universitare dhe konferencave ndërkombëtare”, tha Buja.