Një nga zonat më të tmerrshme sa i përket kushteve e trajtimit brenda kampit të Goli Otokut ka qenë “Gropa e Petrit”.
Për funksionin e kësaj grope në emisionin “n’Demos” ka foluri profesori Merimam Braha.
“Në Gropën e Petrit që ishte ferri i ferrit ishte edhe një shqiptar, Qamil Borovina ka qenë nga Gjakova dhe ka qenë ushtarak, kolonel ka qenë me gradë dhe ka përfundu në Goli Otok. Ata nuk i kanë nda veqmas shqiptarët, të gjitha të burgosurit janë fut në 24 baraka që janë ndërtuar nga po të burgosurit. Secila barakë ka qenë me 250 deri 300 shtretër, ato shtretër kanë qenë në tre kate, ka qenë një dërrasë e një mbulojë, tjetër sen nuk ka pas, as jastëk jo. Këta i kanë rrethu aty me dy tela, ka qenë teli i vogël edhe ai i madh, rrethi i vogël ka dal në rrethin e madh, e ky rreth lidhet me gropën e Petrit, ajo gropë ka qenë nja barakë, me rreth 300 të burgosur brenda”, është shprehur ai.
Kjo gropë sipas Brahës është emërtuar në bazë të burgosurit të parë që ishte edhe ish-kryetar i Kuvendit të Malit të Zi.
“Italianët e kanë provuar të gjejnë fije të boksitit, por nuk e kanë gjet, e më pas ajo gropë e braktisur prej hulumtuesve i ka shërby për me bo ferrin në ferr. Gropa ka qenë e thellë 8 metra, mbi gropë është ndërtu një mur 3 metra, reflektorët janë vendosur në katër anë, dhe lartë ka qenë mbikëqyrja e armatosur, të cilët kanë ruajtuar se mos po dalin, edhe pse ka qenë e pamundur. Petër Kominist ka qenë kryetar i kuvendit të Malit të Zi ka qenë i pari aty, e pastaj e kanë emërtu ashtu”, ka shtuar ai.
Në çdo rrëfim për kampin e Goli Otokut, e pashmnagshme për studiuesin Braha ka qenë përshkrimi i kushteve e trajtimit që kishin të burgosurit.
“Brenda burgut është ngrit një ndërtesë si hotel, aty kanë banu udbashët, ata i kanë pasur nga 2-3 javë, 50 e diçka kanë qenë të stacionun aty, e kanë pasur për detyrë që secilin të burgosur politik më malltretu pa pushim, punë, punë e rand, me thy gurë me bajt gurë. Në dy-tri vitet e para nuk ka pasur as prodhime, është quajtur ndërmarrje, por jo ka qenë ndëshkimorja më e madhe në Jugosllavi, as uj nuk ka pasur për të pirë. Tri gota ujë i ka pasur i burgosuri brenda ditës, qaq temperatura e lartë ka qenë sa që djersa e ka mbulu djersën”, ka përfunduar Braha.
Emisioni i plotë: