Berisha: Shkuarja e guvernatorit të BQK-së në takim është modalitet teknik

Deputeti i Partisë Demokratike të Kosovës (PDK), Hisen Berisha në lidhje me takimin e sotëm në Bruksel ku u diskutua për dinarin serb ka thënë se dërgimi i guvernatorit të BQK-së në këtë takim është vetëm “modalitet teknik”.

Sipas tij, ky është një hap i implementimit të Asociacionit pasi siç thotë ai sot është biseduar teknikisht nga guvernatori, do të negociohet nga zëvendëskryeministri, Besnik Bislimi dhe marrëveshja do të pranohet nga kryeministri i Kosovës, Albin Kurti.

“Vajtja e këtij është modalitet teknik se si të lejohet dinari të lejohet të bëhet valutë zyrtare në komunat që janë pjesë e Asociacionit. Këtë e ka biseduar teknikisht guvernatori, e ka negociuar Bislimi, marrëveshjen shkon e merr Kurti. Ky është hapi i implementimit të Asociacionit, pa e sjellë në qeveri dhe pa e bërë me vendim dhe ta dërgojnë në Kushtetuese, sepse po ta dërgojnë në Kushtetuese, i bie ta ndajnë Kosovën dhe i bie vrasje politike”, ka deklaruar Berisha.

Sipas Berishës, guvernatori nuk guxon të bëjë marrëveshje.

Ndryshe, sot në Bruksel është mbajtur takimi në mes të ekspertëve financiarë të Kosovës dhe Serbisë nën ndërmjetësimin e emisarit evropian për dialogun, Miroslav Lajçak, lidhur me përdorimin e dinarit serb në Kosovë.

Para takimit trepalësh, emisari Lajçak u takua me delegacionin serb, të udhëhequr nga kryenegociatori Petar Petkoviq. Më pas u takua me guvernatorin e Bankës Qendrore të Kosovës, Ahmet Ismaili.

I dërguari special i Bashkimit Evropian për dialogun Kosovë-Serbi, Miroslav Lajçak, pas takimit në Bruksel për çështjen e dinarit serb, ka thënë se nevojiten takime shtesë, pasi sipas tij, shumë pyetje politike mbetën pa përgjigje.

Po ashtu, edhe Banka Qendrore e Kosovës ka njoftuar për diskutimet në takimin e sotëm në Bruksel për çështjen e dinarit serb.

Gjatë këtij takimi, delegacioni i BQK-së ka informuar dhe paraqitur argumentet lidhur me Rregulloren për Operacione me Para të Gatshme.

Në njoftim thuhet se përfaqësuesit e Bashkimit Evropian nuk e kanë vënë në dyshim mandatin e BQK-së për rregullimin e çështjes së dinarit, por brengat e tyre kanë të bëjnë me ndikimin që mund të ketë te komuniteti serb në Kosovë.